BAUKAU, STLTIMORLESTE.com – Vendedores balun iha merkadu Munisipal Baukau sente triste, tanba sira nia baraka ba atividade negosiu nian hetan sobu husi autoridade relevante sira iha Munisipiu Baukau.
Vendedores husi Postu Administrativu Uatulari, Munispiu Vikeke, Fernanda da Cruz hateten, razaun halao negosiu iha merkadu Munisipal Baukau ka merkadu Tuanau, tanba nesesidade no nuudar sidadaun Timor hakarak asesu merkadu refere hodi faan produtu lokal sira nunee hetan redimentu sustenta ekonomia familia.
Produtu lokal neebe sira lori husi Munisipiu Vikeke faan iha merkadu Munisipal Baukau mak hanesan hudi, hare huut no seluk tan neebe ho volume boot, no faan iha merkadu Munisipal Baukau kuaze besik too semana hafoin produtu neebe faan hotu.
Nunee hanesan sidadaun Timoroan hakarak harii baraka ida hodi satan loron nia manas no mahobeen, maibe obrigadu autoridade relevante iha Munisipiu Baukau tenke sobu sira nia baraka kuaze 10 resin neebe kompostu vendedores sira husi Munisipiu Vikeke no Baukau.
Situasaun nee halo vendedores Fernanda da Cruz sente triste, tanba bandu Uatulari oan faan produtu iha Buakau.
“Ami sente triste, tanba sira dehan Uatulari oan labele mai faan iha Baukau, ami Uatulari barak dehan bele faan iha Baukau maibe labele halo uma, dehan faan hotu ga la hotu tenke ba fali Uatulari,” hateten Fernanda da Cruz ba jornalista sira iha merkadu Munisipal Baukau, Sesta (18/07/2025).
Vendedores nee konta, baraka neebe antes nee utiliza ba deskansa tempu kalan nian daudaun laiha ona, tanba parte relevante sira sobu, nunee obrigadu iha tempu kalan toba deit iha faan fatin neebe laiha ona baraka.
Negosiante husi Munisipiu hanesan, Adolzina konta, sira faan sasan liu-liu produtu lokal iha merkadu Baukau kuaze tinan tolu ona, tanba hahu kedas faan iha merkadu tuan Vila Nova hafoin autoridade Munisipiu Baukau muda vendedores sira ba merkadu foun Munisipal Baukau.
“Ami husi Uatulari mai faan sasan iha nee tinan tolu ona. Halo uma iha nee toba iha laran, maibe sobu ami nia uma agora toba iha liur. Sira dehan Uatulari labele faan sasan iha nee,” hateten vendedores nee.
Vendedores nee katak, razaun halo baraka iha merkadu Munisipal Baukau objetivu atu utiliza hodi faan sasan no hein sasan iha tempu kalan, tanba merkadu Munisipal Baukau laiha seguransa atu asegura vendedores sira nia sasan iha tempu kalan.
Maibe baraka neebe harii hetan sobu husi parte relevante sira iha Munisipiu Baukau neebe ho liafuan Uatulari oan labele faan sasan iha merkadu Munisipal refere.
Hatan ba kestaun nee, Diretor Servisu Jestaun Merkadu Munisipal Baukau, Jeronimo Freitas hateten, baraka neeebe sobu iha merkadu Munisipal Baukau hamutuk 15, tanba laiha konhesimentu husi Jestaun Merkadu no vendedores sira idak-idak harii baraka nunee ekipa sobu, maibe Jestaun Merkadu Munisipal mos fo hanoin ba vendedores sira atu rejistu naran hafoin parte Jestaun Merkadu Munisipal Baukau haree fatin seluk iha area merkadu Munisipal hodi sukat atribui ba sira utiliza ba atividade negosiu, tanba baraka neebe sobu vendedores sira okupa espasu ema lao ain asesu fatin sanitariu no okupa fatin vendedores ambulante sira.
Nunee kona-ba deklarasaun neebe vendedores sira husi Munisipiu Vikeke fo sai la oos, tanba ekipa ba ho regras.
“Liafuan neebe deha Uatulari oan labele faan iha nee la loos, ekipa sira neebe ba ho regras, nee mesak sira nia inan aman deit, sira ba hatoo deit katak, fatin nee muda laos tolok sira haruka sira fila, sira hotu-hotu direitu faan, maibe fatin neebe sira okupa nee mak ami haruka hasai tiha para sira mai rejistu fo fatin ba sira,” katak Jeronimo.
Diretor nee argumentu, vendedores husi Munisipiu Vikeke neebe faan sasan iha vendedores ambulante sira nia fatin, nunee kuandu faan la hotu husu buka terpal taka sasan sira labele estragus, laos konstrui uma iha laran, tanba fatin neebe sira utiliza hodi ekipa sobu sira nia baraka, fatin nee direitu ba vendedores ambulante hotu atu asesu.
Kestaun vendedores husi Munisipiu seluk hanesan Vikeke neebe halao negosiu iha merkadu Munisipal Baukau, neebe ho argumenta katak laiha familia iha Baukau nunee harii baraka permanente iha merkadu Munisipal laran nee, Diretor Jestaun Merkadu Munisipal Baukau la fiar, tanba Baukau ho Vikeke mesak lian ida deit.
Nunee harii baraka nee konsidera nuudar planu ida husi vendedores sira atu taka fatin ba vendedores ambulante seluk atu asesu, maibe fatin neebe sira okupa medida 50X50 direitu ba vendedores ambulante hotu-hotu atu asesu, atu sasan sira faan hotu ga la hotu too tempu kalan taka fila ba uma no kontinua faan fali iha tempu loron.
Tanba nee ba oin Autoridade Jestaun Merkadu Munisipal Baukau planu ona vendedores neebe la hetan fatin sei hetan hotu fatin ba negosiu, maibe tenke liu husi rejistu, nunee vendedores neebe iha hotu-hotu hetan fatin hodi halao atividade negosiu.
(tom)
