DILI, STLTIMORLESTE.com – Sekretariu Estadu Asuntu Toponomía no Organizasaun Urbana (SEATOU), Germano Santa Brites husu ba vendadores sira tenke hakruk ba lei neebe vigor iha nasaun RDTL no labele halao negosiu iha espasu publiku.
Nia dehan, vendedor sira neebe nafatin okupa iha espasu publiku mak SEATOU kontínua tau ekipa iha fatin sira neebe muda sira nia nafatin neebe mak prepara.
“Ita tau nafatin ekipa para kontinua muda vendedores, ita hotu tenke hakruk ba lei nee, tenke hakruk ba lei fila ba merkadu, estadu no Governu luta no manan ona rai ida iha Merkadu Manleu nia kotuk, rai estadu nian estadu prepara kondisoes para futuru tau merkadu iha neeba para hotu-hotu faan iha laran, espasu publiku ita la utiliza hodi faan,” hatete SEATOU, Germano ba STL iha PN, Kuarta (13/11/2024).
Nia tenik, se mak la kompri ekipa konjunta sei muda tuir lei haruka, vendedor sira la koopera mak daudaun nee sei la iha tolera vendedores sira.
“Se mak toos SEATOU ho ekipa konjunta sei halo servisu atu muda tuir lei nia hakarak, lei haruka ita tenke koopera, ita la tolera ho vendedóres atu manda fali Governu,” nia dehan.
Nia informa, lei ba selu koima iha tiha ona, maibé haree vendedor ambulante sira ida loro-loron faan deit tomate, aimanas no modo nee sira bele selu maibe lei nee aplika ona ba sira neebe mak faan karreta ho motor iha tasi- ibun sira nee.
Tanba nee agora sira buka fatin, baibain avizu hela deit, buka fatin aluga para seguru, koopera tinan ida ho balun pasiénsia tenke prega multa.
Iha fatin ketak, Negosiante Kampung Baru, Carlito Ximenes hatete, SEATOU uza burtalizmu hasoru vendedores, tanba sira salva nia sasan mak hetan baku.
“Ami faan nee kalan mak faan iha nee, maibe iha mumentu neeba, sira mai atu foti hotu ami nia produtu neebe ami faan mak ami salva ami nia sasan, entaun ami baku malu, maibe ami hakarak kazu nee levanta ba PR no PM, atu nunee sira tetu took hahalok sira hanesan nee diak ba povu ou lae,” nia afirma.
(jen)
