BAUKAU, STLTIMORLESTE.com – Autoridade Munisipiu Baukau husu Komisaun Anti Korupsaun (KAK) nia hakarak, kona-ba implementasaun projetu manutensaun estrada urbana Baukau Vila neebe daudaun lao iha terenu, maibe KAK preokupa.
Prezidente Autoridade Munisipiu Baukau, Veneranda Lemos esplika, projetu manutensaun estrada urbana Baukau Vila neebe daudaun kompanhia implementa tipu cor ho sementi iha area planaltu besik rotunda Vila Nova, diresaun husi rotunda Vila Nova ba Hospital Rejional no kontinua ba merkadu foun iha parte suvida planaltu besik area rotunda nee grave.
Nunee Autoridade Munisipiu koordena ho kompanhia implementador ba manutensaun estrada urbana Baukau Vila neebe selebra kontratu ho Ministeriu Obras Publikas husi Governu anterior halo manutensaun tipu cor ho sementi atu fasilita movimentu roda viariu no prevene asidente, tanba fatin estrada aat neebe daudaun cor iha parte suvida fo risku ba movimentu roda viariu liu-liu transporte ambulansia neebe tula pasiente husi baze ba Hospital Rejional Eduardo Ximenes.
Maibe tuir planu KAK liu husi komisariu sei orienta ekipa inspesaun atu halo inspesaun ba projetu refere, tanba kondisaun estrada urbana Baukau Vila sei responde iha tempu besik ho tipu reabilitasaun.
Nunee KAK nia hakarak husu esplikasaun husi Autoridade Munisipiu Baukau, kona-ba projetu manutensaun refere, tanba tempu besik halo reabilitasaun, sei fo impaktu ba manutensaun neebe daudaun lao hela, tanba sei sobu fali, nee gasta osan ba dala rua deit.
“KAK nia hakarak saida, ita halo prevensaun ka ita husik ema dezastre, se KAK hakarak hetan informasaun ba husu kompanhia, labele husu fali Autoridade, Autoridade koordena atu halo prevensaun ba dezastre neebe akontese,” hateten PAM Baukau, Veneranda Lemos ba STL iha Vila Nova, Kuarta (26/03/2025).
Nia sublina, kona-ba projetu manutensaun refere parte KAK husu atu esplika, Autoridade Munisipiu bele halo deit koordenasaun ho kompanhia implementador hodi fo manutensaun ba kondisaun estrada neebe aat, maibe parte KAK atu hatene informasaun klean kona-ba projetu refere bele halo konfirmasaun ba parte kompanhia implementador, tanba kompanhia implementador projetu kontratu husi Governu anterior no Autoridade Munisipiu laiha orsamentu ba projetu refere.
Nia fundamenta, Autoridade Munisipiu mos laiha orsamentu boot atu taka kondisaun estrada aat no kuak neebe grave tebes ho asfaltu, maibe Governu anterior kontratu ona kompanhia implementador no daudaun kontinua hela halo manutensaun ba estrada urbana, nunee Autoridade iha obrigasaun koordena hodi ho kompanhia halo manutensaun ho cor sementi iha area risku hodi fasilita movimentu transporte publiku no privadu.
“Se ita la husu kompanhia entaun osan nee fila fali hotu deit, ita hakarak ida neebe, i nia taka (cor ho sementi) nee mos laos taka too kilometrus, maibe nia taka deit iha oituan neeba, tanba neeba suvida no kuak barak, haruka sira tun mai mak haree,” katak Venerada.
Autoridade nee hateten, bainhira Autoridade Munisipiu la husu kompanhia implementador projetu, orsamentu neebe Governu fo kontratu hodi implementa servisu iha terenu sei fila fali ba Kofre Estadu.
Nunee Autoridade Munisipal koordena ho kompanhia fo manutensaun ba estrada iha Vila laran, liu-liu parte planaltu nian iha suvida neebe grave hodi fasilita movimentu transporte publiku no privadu, tanba data kontratu neebe Governu selebra ho kompanhia implementador sei prevalese hodi halo manutensaun ba estrada kondisaun aat sira ho provizoriu liu husi cor ho sementi.
Entretantu projetu manutensaun estrada urbana neebe daudaun lao, implementa husi kompanhia lokal Roman Grigio, neebe Governu liu husi Ministeriu Obras Publikas fo kontratu iha tinan 2023 ho valor orsamentu rihun US$ 600 responsabiliza ba distansia estrada kilometru 23 husi Vila Antiga too Vila Nova no kontinua ba rotunda Nagardjo, neebe tuir planu kontratu sei remata iha loron 01 Julhu 2025. ho projetu manutensaun fiziku 15%.
(tom)
