BAUKAU, STLTIMORLESTE.com – Prezidente Autoridade Munisipiu Baukau, Veneranda Lemos deklara, nia parte sei hamutuk ho joven feto no mane husi grupu arte marsiais sira hodi kria paz no estabilidade iha Baukau.
Deklarasaun nee Prezidente Autoridade Munisipiu Baukau Veneranda Lemos hateten iha serimonia inagurasaun edifisiu Postu Kelikai Antigu iha Suku Afasa neebe realiza iha loron 27 Junhu nee ho ksolok no parabeniza joven feto mane sira iha Munisipiu Baukau, tanba durante tinan ida fulan 6 nia laran situasaun iha Baukau kuaze lao kontroladu.
“Parabens ba juventude arte marsiais neebe kuandu buat ruma akontese ema hotu nia liman ba arte marsiais, maibe hau fo parabens, tanba imi kontribui paz no estabilidade, imi lalika fuan taridu, tanba hau hamutuk ho imi la halo buat barak, maibe sei koalia ho imi,” hateten Veneranda Lemos.
Nia dezafia joven sira atu orgulhu no sente pertense ba nasaun RDTL liu husi servisu hamutuk ho autoridade sira kria paz no estabilidade, tanba estabilidade inisiu husi joven sira.
Nunee husu nafatin joven sira kria paz no estabilidade, labele lori kroat ba malu, maibe koalia hamnasa ba malu, nunee labele halo kolen parte seguransa sira tan deit hahalok laiha benefisiu.
“Joven sira, imi tenke sente orgulhu, tanba beibeik, maibe beibeik Governu sei halo buat ruma ba imi, fo liman ba malu ba, tanba Timor presiza ita,” Veneranda Hakotu.
(tom)
