BAUKAU, STLTIMORLESTE.com – Prezidente Autoridade Munisipiu Baukau, Veneranda Lemos husu Autoridade Postu Administrativu 8, Suku 59 no Aldeia 281 atu servisu hamutuk ho Autoridade Munisipal, hodi atinji dezenvolvimentu ba komunidade nian mehi ba moris diak.
“Hau enkoraja sira hotu atu servisu hamutuk ho Autoridade Munisipal husi Suku 59, Administrador Postu sira, Xefe Aldeia sira, camada sosiais hotu atu tinan foun 2025 ita bele servisu besik liu tan bele atinji komunidade nia mehi ba moris diak,” dehan Veneranda ba jornalista sira iha Vila Nova, Sabadu (28/12/2024).
Veneranda hateten, liu husi servisu hamutuk mak bele atinji metas no dezenvolvimentu ba prioridade tuir komunidade nia hakarak, tanba 2025 orsamentu ba projetu sira atu implementa liu husi Programa Nasional Dezenvolvimentu Suku sei aloka direita husi Autoridade Munisipal ba kada Suku hafoin implementa projetu prioridade sira tuir komunidade nia hakarak neebe kada Suku identifika.
Aleinde mos servisu hamutuk mak bele fo susesu ba projetu 11 neebe sei implementa iha 2025, kompostu husi projetu infraestrutura saude 9 no edukasun 2 iha Postu Administrativu sira ho aloka osan hamutuk US$ 1.4 husi Orsamentu Jeral Estadu 2025 iha Autoridade Munisipal, maibe sei hein dekretu ezekusaun husi Ministeriu Finansas.
Nomos iha projetu Nasional seluk neebe sei implementa iha Baukau, mak hanesan reabilitasaun estrada urbana husi Vila Antiga too Vila Nova, estrada Kaisidu inklui konstrusaun edifisiu Asembleia Munisipal, Merkadu Munisipal Tuanaun no seluk tan.
“Neebe buat barak sei akontese iha 2025. projetu nee atu reduz lae, maibe ita bele responde buat balun. Programa IX Governu Konstitusional mos tau prioridade ba Munisipiu hotu, neebe ita lao fazeada,” Veneranda akresenta.
Enkuantu Xefe Suku Soba, Francisca Monica de Fatima Soares argumenta, hanesan lidaransa komunidade iha nivel Suku sempre koopera ho Autoridade nivel Munisipiu, tanba preokupasaun sira husi komunidade nian iha nivel Suku kona-ba eletrisidade, bee moos no seluk tan atu hetan responde hodi fo solusaun, tenke liu husi Munisipiu hafoin ba too iha nivel nasional hodi fo solusaun.
Monica husu Autoridade Munisipal atu nafatin orsamentu masimu iha Programa Dezenvolvimentu Integradu Munisipal (PDIN) no PNDS, nunee bele responde problema infraestrutura bazika sira hanesan, problema bee moos, eletrisidade, saude, estrada no seluk tan neebe komunidade iha area remotas sei presiza, tanba Munisipiu Baukau rasik area luan ho total populasaun barak, maibe balun seidauk sente benefisiu husi tempu ukun aan, tanba balun seidauk asesu eletrisidade, bee moos no seluk tan.
(EST 2)
