BAUKAU, STLTIMORLESTE.com – Prezidente Autoridade Munisipiu Baukau husu Baukau Oan sira atu garante pas no estabilidade hodi festeza loron Natal tinan 2025 no tinan foun 2026.
“Hanesan Prezidente Autoridade hau temi Baukau hau nian, o nian, ita hotu nian, Baukau Timor oan nian, se mak atu garante estabilidade pas no armonia iha Baukau laos seguransa mesak, laos Autoridade mesak, maibe ita hotu-hotu neebe moris iha Baukau, ita hakarak atu oferese moris ida mais tranquilo ba ita nia komunidade tomak,” Veneranda Lemos hateten ba jornalista STL iha nia knaar fatin Servisu Administrasaun Autoridade Munisipal Vila Nova Baukau, Kuarta (03/12/2025).
Autoridade Munisipiu Baukau nee sublina, asuntu seguransa neebe atu kontribui pas no estabilidade iha festeza Natal tinan 2025, laos parte Polisia no Autoridade Munisipiu nia responsabilidade, maibe mai husi konsiensia pesoal nian tane Baukau nuudar ema hotu nia responsabilidade, nunee bele garante seguransa ida tranquilo ba komunidade iha Baukau.
Tanba nee konvida joven Baukau oan hotu no kamadas sosiais hotu atu nafatin mantein pas no hakmatek iha Baukau, nunee bele selebra natal tinan 2025 ho kontente nakonu ho pas no selebra tinan foun 2026 ho prosperu.
“Ita hotu hamutuk, hanesan ema fiar nain sarani Katoliku neebe iha nia fiar no lisan ita hotu hamutuk mai ita konserva ita nia rai, garante moris iha pas no estabilidade, tanba ita hotu mak responsavel iha Baukau,” nia hakotu.
Jornalista: Tomas Reis
Editor: Xisto Mendonça
