BAUKAU, STLTIMORLESTE.com – Prezidente Autoridade Munisipiu Baukau, Veneranda Lemos husu eleitores sira husi suku foun 2 hanesan Builai no Kaibada iha Postu Administrativu Baukau Vila, atu hili kandidatu neebe hatene lori komunidade nia lian ba Administrasaun Munisipal.
Autoridade Administrasaun Munisipal nee esplika, preparasaun dahuluk neebe realiza husi STAE Baukau mak halo ona sosializasaun iha nivel suku foun sira neebe iha esperansa realiza eleisaun iha loron 25 Janeiru nee, sei laiha duvidas, tanba eleitores sira iha ona konhesimentu kona-ba lalaok votasaun nian.
“Ba komunidade sira hotu, fihir lideransa neebe mak ita boot sira sente katak sei fo tulun, lori ita boot sira nia lian too iha Postu no Munisipiu,” rekomenda Veneranda ba STL iha salaun Administrasaun Munisipal, Baukau, Kinta (23/01/2025).
Eleisaun ba lideransa Suku 3, hanesan Suku Werumata pertense ba Postu Administrativu Laga iha kandidadu uniku, maibe suku foun 2 seluk hanesan Builai no Kaibada neebe pertense ba Postu Baukau Vila iha kandidatu nain 2 ba leten.
Nunee Veneranda enkoraja eleitores sira atu fihir kandidatu neebe iha kapasidade, abilidade no hatene servisu ho komunidade, nunee bele hatoo povu nia aspirasaun ba too iha Autoridade Munisipal hodi tetu, maibe bainhira hili kandidatu fihir husi relasaun familia, sei fo impaktu ba prosesu sira.
Mezmu kandidatu hotu husi sira nia suku orijen neebe iha relasaun familia ho eleitores sira, maibe Veneranda garante, eleitores sei la fihir ba relasaun familia, maibe fihir ba kapasidade, abilidade no hatene servisu ho komunidade, hodi fo solusaun ba problema sira iha suku laran.
Tanba tuir lista neebe parte STAE Baukau antes nee simu husi Suku foun 3 refere kandidatu hamutuk nain 7, neebe Suku Builai iha kandidadu nain 3 kompostu feto 1 mane 2, Kaibada mane nain 3 no Werumata kandidatu uniku mane 1.
Enkuantu Diretor Sekretariadu Tekniku Administrasaun Eleitoral Munisipiu Baukau, Natividade Freitas Guterres haktuir, iha loron 21 Janeiru nee, parte nasional distribui ona material sensitivu no laos sensitivu ba munisipiu sira neebe atu realiza eleisaun hodi hili lideransa ba suku foun.
Iha loron 23 Janeiru halo pakotementu iha salaun apuramentu Munisipal hodi loron 24 Janeiru distribui ba sentru votasaun sira iha nivel Aldeia, tanba eleisaun refere sei hahu iha loron 25 Janeiru 2025, iha tuku 09:00 retama 03:00.
“Ita garante katak eleisaun eleitores sei partisipa masimu, tanba harii suku nee sira nia hakarak mak pedidu ba Governu harii suku foun, tanba nee hau espera eleitores entuziasmu atu partisipa,” Natividade argumenta
Diretor STAE Baukau nee garante eleisaun ba Suku 3 refere sei lao ho diak, tanba antes nee parte STAE esforsu ona no lansa ona halo sosializasaun ba Lei Nu. 09/2016 no Diploma Ministerial kona-ba loron eleisaun nian, tanba nee husu eleitores sira atu partisipa masimu iha eleisaun refere.
Dokumentu neebe STAE permite atu lori ba sentru votasaun hodi partisipa eleisaun mak hanesan kartaun eleitoral orijinal, maibe bazeia ba Aldeia neebe eziste iha Suku foun 3 refere.
Aldeia neebe eziste iha Suku Builai mak hanesan Aldeia Builai, Alala, Manulau no Samalakuliba, Suku Kaibada iha Aldeia Borubaha, Kaibuilale, Datawa no Maulame. Enkuantu Suku Werumata Aldeia iha 1 mak Aldeia Werumata.
Nunee STAE Baukau rejistu membru asembleia meza hodi akompanha eleisaun refere hamutuk nain 27 no sei apoiu tan nain 7 hodi reforsa ba Aldeia neebe iha eleitores liu 300, tanba eleitores neebe atu partisipa iha eleisaun refere hamutuk 3.596, kompostu Suku Builai iha eleitores 1.630, Kaibada 1.605 no Suku Werumata iha eleitores 361.
Folhas boletin votu neebe STAE Baukau hetan hamutuk 4.100, inklui karimbu 9 no seluk tan, neebe sei distribui ba sentru votasaun 9 iha Aldeia 9, Suku Builai, Kaibada no Werumata.
Entretantu estabelesimentu ba Suku foun 3 refere bazeia ba Lei Suku Nu 19/2023 previstu iha artigu 91, fo kompetensia ba Ministeriu Administrasaun Estatal (MAE) deside kriasaun suku foun referidu.
(EST 2)
