BAUKAU, STLTIMORLESTE.com – Autoridade Munisipiu Baukau, Veneranda Lemos husu Diretores Servisu Munisipal sira, atu ezekuta Orsamentu Jeral Estadu (OJE) 2025 ho diak, nunee bele benefisiu ba povu Baukau.
Rekomendasaun nee Autoridade Munisipal masimu nee hatoo ba jornalista sira, hafoin remata serimonia avaliasaun servisu tinan 2024 nian iha Salaun Sentru Konvensaun Vila Antiga, Kuarta (08/01/2025).
“Mensajen ba funsionarius diretivas hotu, nomos ba Autoridade Postu Administrativu sira bainhira ezekuta ita nia programa orsamentu sira ho diak ita fo duni atinjimentu prosperidade ba ita nia povu,” dehan Veneranda.
Tanba tuir nia, orsamentu neebe kada tinan Governu aloka ba Autoridade Munisipal sira, liu-liu Munisipal Baukau bazeia ba proposta neebe desidi ona ba atividades, programa no sub-programa sira atu implementa.
Nunee OJE 2025 nian prezisa fokus liu tan hodi ezekuta orsamentu ho diak atu bele fo benefisiu ba povu liu husi orsamentu neebe aloka ona nia ezekusaun.
Aleinde nee nia dehan, iha OJE 2024 mezmu ezekusaun Autoridade Munisipal Baukau konsege liu atinjimentu husi Ministeriu Finansas ba 85% nian no konsege atinji too 88.71%, maibe nee seidauk bele responde, tanba Departementu Servisu Munisipal balu ezekuta orsamentu 2024 nian la apar atividades programa no sub-programa neebe atribui hodi la atinji 85%.
Enkuantu OJE 2024 neebe aloka ba Munisipiu Baukau hamutuk US$ 9,456.741, koloka ba salariu no vensimentu US$ 2,232.281, bens no servisu US$ 725.907, transferensia publika US$ 4,607.366, kapital menor US$ 165.300 no aloka US$ 1,725.887 ba kapital dezenvolvimentu hodi implementa ba projetu 10 liu husi Programa Dezenvolvimentu Integradu Munisipal neebe halo ona pagamantu 90%, maibe atu hakat ba pagamantu 100% nian sei akontese iha tinan 2025 nee, tanba sei iha faze retensaun ba projetu 10 refere.
No OJE 2025 Baukau hetan alokasaun hamutuk milhões US$ 12.437.747.00 fahe ba kategoria salariu no vensimentu hamutuk milhaun US$ 2.712.445, bens servisu rihun US$ 742.500, transferensia publiku milhaun US$ 7.475.580 no kapital dezenvolvimentu sei aloka ba projetu PDIM hodi haree setor edukasun no saude neebe sei implementa hamutuk projetu 11.
Autoridade Baukau mos simu ona envolope fiskal 2025 nian husi Ministeriu Finansas neebe daudaun halo hela preparasaun hodi tempu badak nee distribui ba Diretores Servisu Munisipal sira hodi hahu implementa OJE 2025.
Nunee mos Diretor Servisu Munisipal Dezastre Naturais Baukau, Clementino Barboza relata, alokasaun orsamentu 2024 nian ba Diresaun Dezastre Naturais hamutuk rihun US$ 50 resin, maibe ezekuta deit rihun US$ 30 resin ho taxa ezekusaun 65% hodi rihun US$ 20 resin fila ba kofre estadu.
Clementino rekonhese, ezekusaun 2024 neebe pursentu tuun liu iha Administrasaun Munisipal Baukau mak husi Diresaun Servisu Dezastre Naturais, tanba impkatu husi mudansa estrutura, inklui relatoriu ba atividade palestra no alimentasaun seidauk relata ba parte Finansas Munisipal.
Seluk mak atividade adisional barak liu fali servisu dezastre nian hanesan selebrasaun loron nasional sira, prosesu muda merkadu vila nova, beskem no vila antiga ba Tuanaun inklui atende vitima dezastre naturais hamutuk 479.
“Eventu sira nee ami involve iha komisaun atividade diresaun abandonadu kuaze trismesre primeiru too kuartu nee hau ho hau nia Xefe ekipa fokus liu ba neeba, entaun ida nee mos sai razaun fundamentu ami labele implementa atividade rutina,” Clementino argumenta.
Maibe nia garante OJE 2025 neebe Governu prevee ba Autoridade Munisipal hodi aloka ba diresaun dezastre naturais sei implementa ho diak liu tan, tanba liu husi falhansu ezekusaun OJE 2024 nian sai ona lisaun atu hadia diak liu tan.
(EST 2)
