BAUKAU, STLTIMORLESTE.com – Prezidente Autoridade Munisipiu Baukau, Veneranda Lemos hateten, Autoridade Munisipal la permite sidadaun estranjeiru, liu-liu Xina halo negosiu retalhu iha Merkadu Baukau.
“Iha Baukau hanesan hau hateten, ita la konkorda negosiante estranjeiru sira mai Baukau halo negosiu hanesan mos Baukau oan, liu-liu Xineza sira mai Baukau loke loja la hun la dikin faan sasan laiha kualidade i karun liu, ida nee ita lakohi, tanba nee tun ba haree,” dehan Veneranda ba STL iha Administrasaun Munisipal Baukau, Sesta (24/01/2025).
Autoridade Administrasaun Baukau nee konsidera, emprezariu Baukau oan mos iha kapasidade atu halo negosiu hanesan ho Xina sira neebe daudaun halo negosiu iha Timor, tanba loja emprezariu lokal sira iha Baukau mos daudaun fo hela servisu hanesan ho Xina sira.
Nunee iha loron 20 Janeiru nee liu husi ekipa konjunta halo inspesaun ba loja Xina sira eziste iha Baukau, hodi haree lisensa negosiu neebe SERVE atribui, maibe ekipa identifika Xina sira iha Baukau faan sasan retalhu, nunee haruka taka kedas, tanba lisensa neebe SERVE atribui atu faan sasan grosir.
Maibe iha loron 22 Janeiru nee, loja Xina nian neebe ekipa konjunta taka loke fali kedas ba publiku ho tipu negosiu hanesan baibain, faan sasan retalhu.
Prezidente Autoridade nee hateten, relasiona ho loja Xina neebe ekipa konjunta haruka taka, maibe daudaun loke fali ona ba publiku, Autoridade Munisipal koordena ona ho parte SEVRE atu haree hikas lisensa sira neebe antes nee atribui ba Xina.
Enkuantu antes nee Xefe Ekipa Konjunta atual Sekretariu Munisipal Planeamentu Investimentu no Dezenvolvimentu, Eduardo Filipe Ximenes bainhira remata inspesaun ba loja Xina 2 iha area Planaltu Vila Nova hateten, sei koordena ho parte seguransa hodi deporta Xina sira ba halo negosiu iha Dili, tanba halo negosiu iha Baukau la tuir lisensa neebe SERVE atribui, tuir lo-loos faan sasan grosir, maibe faan retalhu.
(EST 2)
