BAUKAU, STLTIMORLESTE.com – Prezidente Autoridade Munisipiu Baukau, Veneranda Lemos konfirma, reabilitasaun estrada urbana Baukau Vila sei akontese iha fulan Maiu tinan nee.
“Hau konfirma ho ADN dezenhu sira prontu ona, verifikasaun besik remata ona, ita espera verifikasaun nee remata iha fulan Abril ou Maiu sira nee bele ona halo lansamentu ba estrada urbanas,” informa Veneranda ba STL iha Vila Antiga, Kuarta (19/03/2025).
Autoridade Munisipiu nee argumenta, hafoin simu mandatu, barak kestiona iha problema infraestrutura sira iha Baukau imposivel Governu atu responde, maibe realidade daudaun akontese hanesan reabilitasaun estrada diresaun husi Kairavela Vemasi too iha Lanud Baukau no husi Suku Loilubu ba Postu Venilale hahu ona iha fulan Fevereiru, tanba parte esforsu husi Autoridade Munisipal.
Nunee kona-ba estrada urbana Baukau Vila parte Autoridade Munisipal kontinua tenta parte relevante sira iha Nasional hodi responde sedu, tanba daudaun kondisaun aat hodi prejudika movimentu transporte publiku no privadu.
Mezmu parte tekniku Obras Publikas Nasional atu halo tan verikasaun ba estrada refere, maibe Autoridade Munisipiu suspende, tanba daudaun iha ona prosesu laran no hein lansa fatuk dahuluk iha tempu besik.
Veneranda rekonhese, antes nee nia parte deklara ba publiku kona-ba reabilitasaun estrada urbana Baukau Vila, neebe katak akontese inisiu fulan Fevereiru tinan nee, maibe seidauk akontese, tanba kestaun tekniku iha Nasional.
Nunee husu publiku labele dezanima ho prosesu reabilitasaun estrada neebe seidauk akontese, maibe kalma hodi akompanha prosesu, tempu besik sei akontese.
“Baukau hau nian o nian ita hotu nian, haree ba tau matan dezenvolvimentu mai daudaun, no dezenvolvimentu nee sei afeta ba komunidade balu neebe hela iha estrada ninin,” Veneranda akresenta.
Autoridade Munisipiu nee realsa, bainhira reabilitasaun estrada urbana Baukau Vila hahu sei afeta ba uma komunidade neebe hela besik iha estrada ninin, nunee husu atu koopera ba dezenvolvimentu neebe sei mosu mai.
Entretantu tuir levantamentu dadus ba estrada urbana Baukau Vila husi Vila Antiga too Vila Nova no kontinua ba Rotunda Nagardjo hamutuk kilometru 23 mak sei hetan reabilitasaun.
(tom)
