BAUKAU, STLTIMORLESTE.com – Prezidente Autoridade Munisipiu Baukau, Veneranda Lemos rekonhese naksalak iha Pajina Ofisial Autoridade Munisipiu Baukau, tanba tau sala tinan ba akontesimentu Masakre Santa Krus iha loron 12 Novembru 1992, maibe lo-loos loron 12 Novembru 1991.
“Hau hakarak husu deskulpa ba lee nain sira neebe asesu pajina Munisipiu nian, horiseik ami dezenha liafuan balu ami hadia tiha fali 12 Novembru 1991, ami tau numeru 12 Novembru 1992,” hateten Veneranda liu husi mensajen iha Parokia, Santo Antonio, Vila Antiga, Baukau, Kuarta (12/11/2025).
Nia konsidera, obra dezenhu ba komemorasaun loron 12 Novembru 1991 neebe tau fali 12 Novembru 1992 nuudar lasu ida la ses husi sala, maibe hafoin publika iha pajina Autoridade Munisipiu Baukau hetan atake no kritika husi lee nain sira hafoin ekipa tekniku hadia hikas.
Nia konsiente, mezmu naksalak refere hetan trata, maibe hanesan sidadaun diak loloos hetan naksalak refere fo hanoin ba malu hodi hadia, laos buka trata malu iha media.
“Mais nee laiha buat ida hodi ita liafuan sira nee ami hadia diak liu tan, maibe atu dehan ida halo kritika nee talvez la halo Ave Maria ida ba erois 12 Novembru nian nein lori lilin ida ba rate,” Veneranda espresa.
Veneranda katak, kritika refere hanesan lisaun ida ba Autoridade Munisipiu Baukau, hodi kontinua lao ba oin hodi halo mudansa ba Baukau no kontinua eroi no eroina liu liu juventude loriku aswain sira nia obra.
Maibe Veneranda triste ho dezenhu refere, tanba tau sala tinan akontesementu hodi publika iha pajina Autoridade Munisipiu Baukau, maibe subar emosaun tristeja.
“Hau triste oituan, maibe hau labele triste, tanba hau fiar erois no eroinas sira 12 Novembru nian iha hau nia kotuk iha hau nia sorin sorin,” Veneranda argumenta.
Jornalista: Tomas Reis
Editora: Carme Ximenes
