BAUKAU, STLTIMORLESTE.com – Prezidente Autoridade Munisipiu Baukau, Veneranda Lemos triste ho Deputadu Virgílio Pereira neebe reprezentante povu iha Parlamentu Nasional (PN), maibe iha momentu sesaun fo votu ba orsamentu Autoridade Baukau, Deputadu nee iha sai hela ba hariis fatin.
“Ita triste kuandu iha reprezentasaun ida iha Parlamentu mak la ezerse nia votus ita triste, maibe ita mos la hatene tanba saida distintu la hela iha plenaria laran razaun hau la hatene, tanba hau mos la koalia ho nai ulun nee neebe hau mos la hatene razaun nee saida nia la vota,” hateten Veneranda Lemos ba jornalista sira, iha Vila Antiga, Kinta (04/12/2025).
Razaun Deputadu nee la fo votu ba orsamentu Autoridade Munisipiu Baukau, Veneranda Lemos la hatene motivu, tanba Deputadu nee ho Prezidente Autoridade Munisipiu Baukau la koalia malu.
Maibe hanesan Autoridade Munisipiu sente triste ho asaun Deputadu refere, tanba Deputadu reprezentante povu iha PN atu defende povu, maibe la fo votus ba orsamentu povu nian.
“Diak liu ita boot sira husu direitamente husi ba nia tanba sa nia la vota, mais hanesan Autoridade sente triste se halo depopozitu,” Veneranda komenta.
Hatan ba kestaun nee, Deputadu Virgílio Pereira katak, nia parte laos la fo votu ba orsamentu Autoridade Munisipiu Baukau, maibe iha momentu sesaun antes fo votu ba orsamentu Autoridade Munisipiu Baukau nia parte sai ba liur tanba nesesidade.
“La vota quer dizer hau iha laran mak la fo votu, mais altura kuandu votasaun nee wainhira ami d’Deputadu fo hotu tiha apresiasaun Governu pur-volta iha 30 ital minutus entaun aproveita Governu nia esplikasaun 30 minutus nee hau sai tiha ba liur hariis fatin soe bee, entertantu hau sai husi hariis fatin hasoru kolega entaun ami rua konversa iha liur, begitu hau tama votasaun nee liu tiha ona, tanba Ministru koresponde lais liu la tuir minutu neebe iha votasaun adianta lais liu entaun hau tama fali mak sira dehan votasaun liu tiha ona, ida nee mak realidade,” Virgílio katak.
Deputadu nee hatete, iha momentu fo votus ba orsamentu Autoridade Munisipiu Baukau mak nia parte iha laran sei fo votu afavor ba orsamentu refere, tanba nee orsamentu ba Munisipiu.
Nia komenta, situasaun ida d’Deputadu sira sai ba liur hariis fatin soe foer kiik no tama fali, haree votasaun liu ona nee buat baibain no orsamentu ba Autoridade Munisipiu Baukau pasa hela ho votus maioria, tanba nee la presiza kestiona, maibe iha ema balu neebe hakarak kestiona liu husi edit foto lansa iha media sosial.
“Se orsamentu la pasa mak dehan nia impaktu nia la vota nee mak orsamentu la pasa ida nee mak ita kestiona mais hau sai hela ba hariis fatin fila mai vota osan mos liu, buat ida Orsamentu Jeral Estadu nee iha balu Bankada Governu deit talvez orienta deit talvez 39 deit nee katak, Deputadu balu sai hela ba hariis fatin nee buat normal, mais hau komprende ida kestiona nee grupu kiik oan ida hau komprende sira nia hakarak no intensaun,”Virgílio katak.
Deputadu nee katak, iha nia intervensaun sira iha Parlamentu Nasional la atake orsamentu ba Autoridade Munisipiu Baukau, maibe iha intervensaun nafatin fo apresiasaun, tanba nee iha sesaun fo votus ba orsamentu Autoridade Munisipiu Baukau mak iha laran sei fo votus ba orsamentu Autoridade Munisipiu Baukau.
Entretantu orsamentu tinan 2026 ba Autoridade Munisipiu Baukau, neebe pasa iha espesialidade hamutuk US$ 13.802.085.
Jornalista: Tomas Reis
Editora: Carme Ximenes
