BAUKAU, STLTIMORLESTE.com – Prezidente Autoridade Munisipiu Baukau, Veneranda Lemos triste Veteranu ka Funu Nain FALINTIL Libertasaun Nasional, Clementino Cabral “Mautidin Aliansa” impede prosesu dezenvolvimentu, liu-liu iha area eis merkadu Vila Nova, Munisipiu Baukau.
Tuir Veneranda, lema husi Kombatentes Libertasaun Nasional, veteranus sira mak nain no riin ba ukun rasik aan, nunee prosesu dezenvolvimentu liu-liu muda merkadu Vila Nova no Vila Antiga ba merkadu foun nee programa husi Governu sentral, nunee tenke muda duni hodi iha espasu implementa dezenvolvimentu.
“Ita dehan dezenvolvimentu nee kontribuisaun husi ema hotu, se veteranus sira mak mai impede fali atu halo mudansa nee hau triste tebes, tanba laos hau nia hakarak, maibe hakarak dezenvolve segundu sidade,” hatete Veneranda ba jornalista sira iha Vila Nova, Kinta (12/12/2024).
Tanba tuir nia, prosesu muda merkadu hahu ho sobu negosiante sira nia baraka no kontinua lao ho programa limpeza, maibe iha merkadu Vila Nova area beskem rotunda nian, uma ka fatin negosiu pertense ba “Mautidin Aliansa” kontinua eziste, tanba ho razaun konsidera impede programa muda merkadu.
Ho nunee Veneranda deskonfia, Mautidin lalao mesak too iha fatin refere hodi halo asaun impede, maibe iha involvimentu husi ema terseira parte, maibe kona-ba programa muda merkadu kontinua lao inklui sei sobu mos fatin refere bainhira too ona nia tempu.
Ba estabilidade nee tenke sobu, ohin nia bele tuur iha neeba, mais tenke sobu, ita laiha rezelva, tanba ita sira okupa fatin ema hotu hanesan, laiha ida mak boot liu ida, se ema hotu sai tanba sa Sr. Mautidin labele,” nia sublina.
Maibe kona-ba deklarasaun “Mautidin Aliansa” husu Primeiru Ministru (PM), Kay Rala Xanana Gusmão no Prezidente Republika (PR) Jose Ramos Horta nia prezensa hafoin sobu fatin, nee mehi, tanba PR simbolu Nasaun no PM Xefe Governu, husi Xefe Governu iha Ministru, husi Ministru mak iha Autoridade Munisipal hodi ezekuta servisu planu Governu nian.
Nunee husu lalika kahur sasan, maibe prepara aan sai husi fatin refere hodi ekipa hahu ona sobu, tanba fatin eis merkadu Vila Nova Autoridade Munisipiu Baukau iha ona planu atu konstrui fatin desportiva ba area voli, basket, futsal, fatin konsertu inklui kria espasu liu-liu jardim hodi fasilita sidadaun halo refreshing, nunee mos merkadu Vila Antiga iha ona atividade planu balun atu prienxe ho fazeadamente.
(EST 2)
