BAUKAU, STLTIMORLESTE.com – Prezidente Autoridade Munisipiu Baukau, Veneranda Lemos hateten, Xefe Suku mak pesoal neebe implementa servisu boot liu no responsabilidade iha nivel Suku.
Lia murak nee Prezidente Autoridade Munisipiu Baukau Veneranda Lemos hateten liu husi diskursu iha serimonia agradesimentu ba mandatu Xefe Suku Kaibada Makasae neebe realiza iha Tersa (29/04/2025).
“Servisu boot tebes iha Xefe Suku sira nia kabas leten, implementa servisu boot liu ho responsabilidade iha Suku laran, tenke garante paz no estabilidade, garante komunidade nia moris diak,” hateten Veneranda Lemos.
Autoridade Munisipiu nee katak, bainhira mosu problema iha nivel Suku, primeiru pesoal neebe atu responde mak Xefe Suku no Xefe Aldeia, tanba iha responsabilidade masimu hodi koordena no garante paz estabilidade ba Povu nia moris diak iha nivel Suku.
Maibe bainhira iha nivel Suku mak komunidade no seluk tan infrenta problema, laiha ona posibilidade atu responde, labele halai liu ba Parlamentu Nasional no Governu Sentral, maibe ba Autoridade iha nivel Postu no Munisipiu hodi solusiona.
Nunee husu komunidade sira, bainhira infrenta problema, labele husik nonok, maibe dere odamatan Autoridade Suku husu fo solusaun, mak bainhira laiha solusaun bele ba iha Autoridade Munisipal no Postu, tanba Autoridade Suku too Munisipiu mak forsa ba Munisipiu ida nian
“Tanba nee ita hotu iha koridor ida deit oinsa atu valoriza ita nia indepedensia atu nunee ita nia komunidade bele moris ho hakmatek nia laran, ita nafatin ida halo separasaun hodi Governu nia atensaun masimu ba Suku sira,” katak Veneranda
Prezidente Autoridade Munisipiu nee hateten, komunidade hotu inklui Autoridade, Suku no Postu hamutuk ho Autoridade Munisipiu Baukau iha koridor ida deit, neebe hakarak dezenvolvimentu atu valoriza independensia, tanba nee husu komunidade hotu atu nafatin kria paz no estabilidade iha Baukau hodi dada Governu nia atensaun ba dezenvolvimentu iha nivel Suku.
Maibe agradese, tanba kuaze tinan ona Autoridade Munisipiu la rona destrubui iha Baukau neebe baibain ema dehan Baukau Muturabu, tanba komunidade hakarak dezenvolvimentu.
“Ita la duun rona ona disturbiu ka krime iha ita nia rai, mantein nafatin ida nee, korajem ba xefe suku ba konselhu suku sira atu mantein Baukau nafatin paz no estabilidade,” Veneranda rekomenda.
(tom)
