DILI, STLTIMORLESTE.com – Veterana Madalena Bidau Soares kodigu ‘’Kasian’’ daudaun nee baixa iha Hospital Nasional Guido Valadares (HNGV), tanba moras kardiovaskular.
Tuir Mediku Kardiolojista iha HNGV, Sidonio Mesquita katak, Veterana Kasian mai halo tratamentu iha HNGV iha loron 11 Dezembru too agora loron 5 ba 6 ona.
“Nia mai diagnosa kardiaka tanba antes nee nia ho moras tensaun kleur ona, entaun la kontrola no halo nia fuan nee bubu,” hatete Mediku nee ba jornalista sira iha nia knaar fatin ICCU HNGV, Tersa (16/12/2025).
Nia dehan, antes nee Veterana tama mai baixa HNGV, Veterana nee mos iha infeksaun iha pulmaun, nunee halo is boot no halo ain bubu. Neemak mediku sira deside tau okjiseniu no kondisaun atual daudaun nee estavel ona.
“Agora daudaun nia kondisaun diak ona, no nia ain mos la bubu book an ba mai diak ona, signifika iha mudansa ba nia moras neebe mak iha, tanba ita HNGV nafatin fo tratamentu diak ba nia,’’nia esplika.
Nia informa, ho fasilidade HNGV neebe mak iha sei halo tratamentu ba Veterana Kasian too diak.
“Konaba planu transferensia ba rai liur nee laiha, tanba Veterana nia moras nee ita nia fasilidade HNGV mos sufisiente atu halo tratamentu ba nia too diak. Agora mos nia kondisaun iha mudansa neebe mak signifikativu,’’ nia informa.
Nia esplika, mediku sira neebe atende nee laos parte fuan mesak haree, maibe veterana mos sofre pulmaun, entaun mediku sira husi pulmaun mos mai obesrva nafatin no fo tratamentu liu-liu aimoruk sira.
“Ho tratamentu neebe mak iha tempu badak veterana bele rekupera husi nia saúde no ita nafatin fo hanoin ba ita-nia veterana ne’e atu nafatin mai kontrola,” nia subliña.
Nia koalia, aimoruk sira nee sufisiente atu atende ba Veterana nee, maibe iha item ida mak la iha, maibe iha aimoruk seluk neebe hanesan bele subtitui atu atende ba pasiente nee rasik.
Entertantu dadaun nee pasiente nain 10 mak baixa hela iha sala ICCU, HNGV hodi hetan tratamentu husi Mediku Espesialita Kardiaku nain 1, Mediku Jeral nain 2 inklui ho Enfermeiru sira.
Jornalista: Emerenciana Pinto
Editora: Domingas Gomes
