BAUKAU, STLTIMORLESTE.com – Veterana Maria Madalena dos Santos “Bi-Kiak” prontu defende motorista Rui dos Santos “Mauserik” iha Konselhu Kombatentes Libertasaun Nasional (CCLN – sigla português) bainhira iha asaun kontra.
Deklarasaun nee Veterana Maria Madalena dos Santos “Bi-Kiak” hateten ba STL liu husi telefone, Kuarta (14/01/2026).
“Hau prontu kualker tempu deit hau prontu, tanba ema nee kaer kareta duni tula duni FALINTIL sira nia rasik ba ho hau ba hasoru Sr. Daitula iha parte Kelikai nian agora tau ona fatuk dahuluk atu halo plaka iha neeba, Daitula mak lakon ona, maibe nia soldadu neebe moris hatene. Nia rasik lao ho hau ba ai laran hasoru FALINTIL neebe sei moris nee mak Sr. Haksolok ho Maulindo,” nia dehan.
Veteranu nee sublina, motorista Rui dos Santos “Mauserik” nia faktus konkretu mak
nuudar kundotor ba kareta Violeta, Raios de Golgota no Tala Indah neebe katak iha tempu okupasaun Indonezia tula hahan ba Forsa FALINTIL no tula jovem halo demostrasaun hasoru invazor Indonezia iha Baukau Vila. Asaun demostrasaun rezultadu kareta Violeta rahun no Mauserik hetan kanek iha parte ain tanba sona inklui kanek mos iha parte ulun tanba hetan baku husi militar Indonezia too kastigu tan nia iha Dan Sektor A Ladun Baukau.
Ba kontribusaun refere, iha tinan 2009 Mauserik rejistu ona naran iha Konselhu Kombatentes Libertasaun Nasional atu hetan direitu hanesan mos nia maluk kombatentes sira seluk, maibe fezilmente lista edital neebe taka sai nia hetan 3a7. Ho nunee nia parte submete ona karta reklamasaun ba Konselhu Kombatentes Libertasaun Nasional atu fo rekoinhesementu neebe dignu.
“Pro nee mak hau ona mais kontra nee mos dala ruma ema laran moras, hau kuandu koalia kona-ba ema sira mai husi indonezia simu pensaun veteranus hau laran moras, ba kombatentes ida nee nia testamunha barak ema responsavel kaixa sira sai testamunha hotu,” Veterana nee akresenta.
Bi-Kiak komenta, bainhira mosu asaun kontra ruma iha kombatentes Mauserik nia lista, sei iha testamunha seluk husi kaixa Melodia no Mate Ruin.
(tom)
