BAUKAU, STLTIMORLESTE.com – Veteranus hamutuk nain 4.024 konsulta saude iha Klinika Veteranus David Alex Dai-Tula Reamare, Suku Bahu, Postu Administrativu Baukau Vila.
Responsavel Sentru Tratamentu Saude Klinika Veteranus David Alex Dai-Tula, Elisio Siqueira esplika, numeru refere hahu rejistu husi fulan Janeiru too Junhu tinan 2025, neebe kompostu veteranus sira husi Munisipiu Baukau no husi Munisipiu seluk tan, hamutuk nain 4.024 mak durante nee halao konsulta saude iha Klinika Veteranus David Alex Dai-Tula Reamare.
“Vizitante veteranu neebe asesu mai iha sentru nee hamutuk 4.024 neebe barak liu mak moras tensaun, problema ruin ho ran midar, iha mos moras seluk estomuk nian nee mak durante nee ita halo atendimentu,” hateten Elisio ba STL iha knaar fatin Reamare, Tersa (22/07/2025).
Nia sublina, husi moras hirak neebe veteranus sira enfrenta, tanba maioria la kontrola hahan no seluk mak kestaun idade.
Nia fundamenta, mezmu rejistu moras refere husi veteranus sira, maibe la implika kondisaun grave ruma, tanba mediku no pesoal saude sira iha sentru klinika fo atendimentu diak, maibe bainhira hetan kondisaun grave natoon obrigatoriu halo transferensia ba Hospital Rejional Eduardo Ximenes (HoREX) Baukau nunee bele hetan atendimentu diak liu tan, tanba iha sentru klinika sei menus ekipamentus.
“Kazu referal veteranu hamutuk 44, nee sira problema fuan, struk ho tensaun neebe aas mai iha nee ita haree kondisaun la duun diak ita transfere sae ba leten,” Elisio akresenta
Nia katak, husi veteranu nain 44 neebe tenta transfere ba HoREX Baukau hodi kontinua halo tratamentu, balun hahu rekupera ona husi moras neebe infrenta no dadaun kontinua halo chekup iha sentru klinika veteranu reamare.
Kestaun Saude, Elisio husu Veteranus sira atu kontinua hakbesik aan ba fasilidade saude neebe instaladu nunee kontinua hetan tratamentu husi mediku sira hodi la afeta too kondisaun kritiku.
Aleinde nee mos nia dehan, ezistensia klinika veteranu laos atende deit veteranus sira, maibe durante nee mos fo asistensia saude ba komunidade sira neebe prezensa iha klinika refere.
Entretantu rekursu umanus neebe halao servisu iha sentru klinika veteranu reamare kompostu mediku jeral, enfremeiru, farmasia neebe hamutuk nain 15 kompostu funsionariu permanente no kontratadu.
(tom)
