BAUKAU, STLTIMORLESTE.com – Veteranu Teotonio Soares “Coitadu” husu joven sira atu estuda hodi kontinua eroi no eroina sira nia mehi iha prosesu dezenvolvimentu nasional.
Iha ambitu selebrasaun loron veteranus ba da-9 nee, Veteranus Teotonio Soares “Coitadu” konsidera, selebrasaun refere nuudar asaun ida fanu eroi no eroina sira neebe lakon isin ba rai doben Timor, atu tulun nafatin Timor oan sira estuda nunee sai matenek hodi iha futuru bele jere nasaun Timor Leste sai nasaun dezenvolvidu hanesan nasaun sira seluk.
“Sira presiza estuda, ita hatene ona inan aman uluk iha ailaran halo oinsa ita hatene ona, uluk ami beik la hatene hakerek senti triste funu nee ita konsege manan, ita kontente,” Veteranu Teotonio Soares “Coitadu” hateten iha Vila Nova Baukau, Tersa (03/03/2026).
Veteranus nee komenta, eroi no eroina neebe uluk sakrifika aan iha prosesu luta libertasaun nasional barak mak analfabetismu, tanba la eskola, maibe rona malu hodi hatutan prisipiu sira no mehi ba ukun aan too Timor hetan nia independensia.
Nunee iha faze ukun aan nuudar oportunidade ba joven sira atu estuda no presiza rona malu, nunee bele hatutan no atinji eroi no eroina sira nia mehi ba Timor Leste iha tempu pasadu liu ba.
“Ami veteranus sira nia tempu nee ita hotu hatene la eskola, agora ita nia joven sira eskola matenek hotu ona haree ho matan rona ho tilun hatutan,” nia sujere.
Iha fatin hanesan, Prezidente Autoridade Munisipiu Baukau, Veneranda Lemos rekonhese, veteranus sira nia luta nuudar eransa neebe husik hela ba jerasaun foinsae no laos deit liberdade politika, maibe responsabilidade moral hodi harii nasaun Timor Leste neebe prosperidade ba povu hodi dezenvolve nasaun ho paz no estabilidade, tanba nee jerasaun foun sira iha obrigasaun atu banati tuir espiritu patriotizmu neebe uluk veteranus sira kaer metin.
“Ohin loron ita tama ba faze luta foun nian hanesan luta hasoru ignoransia no desigualidade sosial,” Veneranda katak.
Nia konsidera, selebrasaun loron veteranus ba da-9 nuudar parte husi estadu nia rekonhesimentu ba veteranus nia sakrifisiu neebe kontribui husi kombatente ba libertasaun nasional, maibe selebrasaun loron veteranus nee laos hanesan serimonia ofisial, maibe nuudar momentu reflesaun ba sidadaun hotu atu hametin unidade nasional no salva guarda ba istoria luta libertasaun nasional neebe sei lakon husi jerasaun ba jerasaun.
“Veteranus sira nia dedikasaun la kole husi rezistensia too organiza klandistina sai fundamenta mentin ba estadu, husi sira nia matenek mak alkansa duni ita nia luta ba ukun aan,” Veneranda komenta.
Prezidente Autoridade Munisipiu Baukau nee konvida sidadaun hotu tenki agradese ba kombatente sira nia luta pasadu sira, hanesan naroman neebe hatudu dalan ba jerasaun foun bainhira atu lao ba oin ho korajen hodi garante katak, raan no klamar neebe fakar ona sei la saugati.
(tom)
