Veteranu Nia Oan Nain 100 Kandidata Aan ba Polisia

BAUKAU, STLTIMORLESTE.com – Veteranu nia oan hamutuk nain 100 resin iha Munisipiu Baukau kandidata aan ba kadetes Polisia foun periodu 2025.

Prezidente Konselhu Kombatentes Munisipiu Baukau, Fernando Beredu’u Gusmão esplika, relasiona vaga ba kadetes foun neebe inisia husi PNTL iha loron 04 Agosto tinan nee, nebee fo oportunidade ba jovem sira iha territoriu nasional ho kouta ba veteranus nia oan sira iha neebe veteranus nia oan iha Munisipiu Baukau hamutuk nain 100 resin foti fixa iha Konselhu Kombatentes Baukau konkore vaga PNTL.

“Hahu iha fulan Agosto nia laran nia lista nee 100 liu ona nee grau 8a14, 15a19 20a24 ho 3a7m 2003 no 2005 nee, 2009 nian seidauk, tanba seidauk taka sai,” hateten Beredu’u ba jornalista sira iha knaar fatin Vila Antiga, Buakau, Kinta (28/08/2025).

Nia sublina, veteranu oan nain 100 resin neebe foti fixa refere husi veteranu dedikasaun eskluzivu 3a7, 8a14, 15a19, 20a24 enkuantu kombatente neebe rejistu iha 2009 oan seidauk iha direitu foti fixa hodi asesu vaga refere, tanba lista kombatentes seidauk taka.

Beredu’u espresa, durante fo atendimentu ba veteranus nia oan sira konkore vaga PNTL, hanesan veteranu sente kontente, tanba Governu fo oportunidade ba veteranus oan konkore iha vaga refere.

“Nee oportunidade, tanba veteranu nia oan mos inklui PNTL, se F-FDTL iha tan hanesan nee ami kontente, tanba uluk la hanezan nee, maibe agora nee mak hanesan nee,” Beredu’u argumentu.

Iha sorin seluk kandidatu kadetes foun hanesan veteranu oan, Delson Antonio Tilman sente kontente, tanba Governu bele inisia vaga PNTL no fo kouta ba veteranu oan iha vaga refere.

“Hau mai iha nee foti fixa veteranu nian atu teste vaga PNTL, agora hau tinan 19 altura 180,” hateten Delson.

Entretantu tuir observasaun jornalista STL nian iha resintu Komando Polisia Munisipiu Baukau haree katak, daudaun ekipa kontinua simu dokumentus husi jovem kandidatu kadetes foun sira tuir regulamentu neebe antes nee estabelese ona.

(tom)