BAUKAU, STLTIMORLESTE.com – Veteranu no kombatente sira neebe rejistu iha tinan 2003, hamutuk nain 788 iha Munisipiu Baukau sei simu kondekorasaun iha loron 27 Novembru 2024.
Sekretariu Jeral Konselhu Munisipal Kombatente Libertasaun Nasional (CMCLN) Baukau, Manuel ‘Alari’ da Costa Soares esplika, veteranu no kombatente refere kompostu husi grau 1, 2 no 3, neebe Estadu Timor Leste sei kondekora liu husi atribuisaun medalha ordem Nicolao Lobato, Guirelheiru no Ordem Funu Nain tuir artigu 11.
“Artigu 11 nee dehan klaru ona, Estadu rekonhese partisipasaun povu Timor Leste iha luta ba libertasaun partria, tanba nee dignifika ema sira nee, fo kondekora sira ho medalha ho pensaun neebe Estadu prepara ba sira,” hatete Manuel ‘Alari’ ba jornalista sira iha Vila Antiga, Baukau, Sesta (22/11/2024).
Veteranu no kombatente tuir nia rejistu husi tinan 2003 neebe atu simu kondekorasaun hamutuk 788 kompostu husi grau 3 nain 744, grau 1 nain 3 no restu seluk grau 2, neebe kuaze Estadu Timor Leste atribui ona nia pensaun, neebe sei hetan kondekorasaun ho Ordem 3 refere tuir grau.
Total refere sei prezensa husi nivel Postu Administrativu 6 iha loron 26 hodi hetan sekuensia seremonia hafoin kontinua simu kondekorasaun iha loron 27 Novembru 2024 neebe sei realiza anivel Munisipal iha salaun Sentru Konvensaun Baukau (CCB), hodi loron 28 Novembru bele utiliza iha seremonia Isar Bandeira Nasional.
Entretantu tuir planu kondekorasaun refere sei ofisialmente sei atribui husi Autoridade relevante sira husi nasional no Munisipiu, neebe sei partisipa masimu husi Autoridade Munisipiu.
(EST 2)
