DILI, STLTIMORLESTE.com – Bankada Partidu FRETILIN preokupa ho jerasaun patriota nain rua (2) neebe ho valor boot no foin lalais kompete bolsa estudu neebe oferese husi Fundu Dezenvolvimentu Kapital Humanu (FDCH) maibe la pasa.
“Iha pratika favoritismu no familiariasmu iha fo bolsa iha fakuldade direitu, tanba iha veteranu ida nia oan neebe nia valor aas liu sira hotu-hotu, maibe nia la hetan bolsa ida,” hatete Deputadu Jaoquim dos Santos, wainhira debate OJE tinan fiskal 2026 ba FDCH iha espesialidade iha PN, Kinta (20/11/2025).
Nia argumenta, kazu seluk mak veteranu ida nia oan ho valor boot kompete bolsa ida husi Ministeriu Saude, maibe nia la hetan bolsa no sira neebe valor kiik mak hetan fali.
Tanba nee Deputadu Joaquin husu MPIE atu haree didiak kriteria neebe FDCH aplika ba konkorente sira, tanba ema neebe ho valor boot lakon fali, ida valor kiik mak pasa fali.
Tuir estatutu nee fo previleiju ba veteranu sira, tanba saida mak buat ida nee tenke akontese, nee hau duvidas oituan iha jestaun ministeriu nian, hau kuandu rona informasaun nee hau nia fuan moras, tanba kolia kona-ba meritu nia hatene hotu.
Hatan ba preokupasaun nee, Ministru Planeamentu Inevestimentu Estratejiku (MPIE), Gastão de Sousa agradese ba informasaun neebe Deputadu Joaquim dos Santos aprezenta no promote sei halo investiasaun.
“Agradese tebes ba informasaun husi deputadu sira no atu aprezenta evidensia liu-liu naran atu nunee hau bele halo investigasaun neebe klean, tanba ita hotu-hotu lakohi buat ida nee atu akontese iha nasaun nee, tanba sidadaun hotu-hotu iha direitu,” hatan Ministru Gastão de Sousa.
Jornalista: Alberto Menezes
Editor: Xisto Mendonça
