BAUKAU, STLTIMORLESTE.com – Veteranu oan hamutuk nain 326 iha Munisipiu Baukau konkore ba bolsu estudu husi Ministeriu Asuntu Kombatentes Libertasaun Nasional (MAKLN) periodu 2025 neebe anunsia ba publiku.
Prezidente Konselhu Munisipal Kombatentes Libertasaun Nasional (KMKLN) Munisipiu Baukau, Fernando “Beredu’u” Gusmão esplika, bolsu estudu refere Ministeriu Asuntu Kombatentes Libertasaun Nasional aplika bazeia ba dekretu lei numeru 08/2009 loron 15 Janeiru neebe atribui bolsu estudu ba veteranus grau 8a14, 15a19, 20a24 inklui mártires nia oan sira hodi asesu eskola gratuita, maibe la aplika ba veteranu grau 4a7, tanba lei la autoriza.
Nunee ministeriu anunsia ba publiku iha loron 24 Marsu too loron 22 Abril, veteranu oan sira iha kada munisipiu submete dokumentus liu husi sede Kombatentes Munisipal, neebe too iha loron 22 Abril nee, KMKLN Baukau rejistu kandidatu hamutuk nain 326.
“Munisipiu Baukau nian konkore ba bolsu estudu SD, SMP, SMU no Universidade rai laran no rai liur hamutuk 326, agora mak atu lori ba Nasional,” hateten Beredu’u ba jornalista sira iha Vila Antiga, Sesta nee (25/04/2025).
Nia sublina, husi kandidatu nain 326 neebe KMKLN rejistu husi veteranu oan sira ba nivel estudu ensinu baziku primeiru, segundu no terseiru siklu, ensinu sekundaria inklui ba universidade iha rai laran no rai liur.
Nia fundamenta, bolsu estudu ba 2025, ministeriu anunsia presiza veteranu oan hamutuk 1.300 iha territoriu Nasional mak sei hetan oportunidade ba bolsu estudu MAKLN, neebe kada munisipiu kandidatu nain 100 mak sei liu selesaun, tanba bazeia ba kriteiru, maibe haree ba kandidatu neebe valor diak.
“Valor hira mak liu selesaun ida nee mak ami la hatene, ami naran simu deit, ami seidauk hatene valor hanesan neebe mak tama ami la hatene, maibe ba neeba mak kriteiru manda,” Beredu’u argumentu.
Prezidente KMKLN Baukau nee akresenta, mezmu daudaun veteranu oan iha Baukau hamutuk nain 326 mak submete ona dokumentus ba bolsu estudu MAKLN 2025, maibe KMKLN sei aprezenta ba iha Nasional hafoin halo selesaun, tanba ba kada munisipiu ministeriu prezisa veteranu oan 100, maibe tenke valor diak.
Nunee dokumentus kandidatu bolsu estudu MAKLN 2025 neebe KMKLN Baukau simu husi veteranu oan sira mak hanesan formulariu rekerimentu bolsu estudu, foto kopia kartaun eleitoral, bilhete identidade, sertidaun nasimentu, matrikula eskolar anu letivu 2025 no 2024 no seluk tan, neebe KLKLN aprezenta ona ba nasional iha loron 25 Abril nee.
Tuir infomasaun neebe iha, lista kandidatu bolsu estudu MAKLN 2025 neebe nasional simu ona rezultadu sei fo sai ba publiku iha loron 25 Setembru 2025 iha sede KMKLN sira iha territoriu nasional no planu sei avizu liu husi media televizaun, jornal, radio nasional no radio komunitariu sira.
Entretantu vaga bolsu estudu tinan 2025 neebe ministeriu tarjetu ba kada munisipiu, ba estudante primeiru siklu prezisa nain 5 no segundu terseiru siklu nain 15, ensinu sekundaria 25, ensinu superior rai laran nain 50 no ensinu superior iha rai liur prezisa nain 5.
(tom)
