BAUKAU, STLTIMORLESTE.com – Veteranus barak hetan kontestasaun husi oan rasik, tanba konsidera la partisipa iha prosesu funu Libertasaun Nasional, maibe hetan direitu husi Estadu Timor Leste.
Segundu Visi Prezidente Konselhu Kombatentes Libertasaun Nasional, Marito Reis hateten, rejistu kombatente no veteranu neebe antes nee lao, daudaun veteranu no kombatente barak hetan ona rekonhesimentu no direitu pensaun kada fulan husi Estadu Timor Leste, maibe barak hetan kontestasaun husi oan sira, tanba razaun la partisipa prosesu luta.
“Agora barak mak oan kontesta aman, dehan aman la halo servisu direitu ida nee ida neeba, kuandu ema seluk halo liu ida nee la hetan fali,” hateten Segundu Visi Prezidente Konselhu Kombatentes Libertasaun Nasional, Marito Reis iha Vila Antiga, Baukau, Sesta (11/04/2025).
Segundu Visi nee hateten, kazu hanesan oan kontesta Aman, Konselhu Kombatentes Libertasaun Nasional rezolve ona balun tuir posibilidade, maibe seluk mos investiga husi ekipa inspetoria hodi kontinua aprezenta ba Ministeriu Publiku no kontinua ba Tribunal.
Nia argumentu, iha lista rejistu kombatente balun la partisipa iha baze apoiu nomos iha frente klandestina, maibe hetan kastigu, nee deskonfia iha terseira parte fasilita, tanba iha prosesu luta ema neebe kastigu, ema neebe husi ai-laran no partisipa iha frente klandestina.
“Agora ami buka investiga didiak, tanba ami mos laiha evidensia halo konvensaun ema, maibe evidensia nee mak buat neebe ema haruka ba ami,” katak Marito.
Aleinde nee mos nia hateten, alterasaun lei neebe limita familia martire joven sira atu simu direitu pensaun husi Estadu Timor Leste, parte Konselhu Kombatentes Libertasaun Nasional relata ona ba Ministeriu Asuntu Kombatentes Libertasaun Nasional atu aprezenta iha Konselhu Ministru no kontinua ba iha Parlamentu Nasional muda lei, tanba presiza joven martire iha ai-laran reprezentante husi familia simu direitu pensaun.
(tom)
