DILI, STLTIMORLESTE.com – Veteranus Ernesto Fernandes ”Dudu” mate iha sala ICU Hospitál Nasionál Guido Valadares (HNGV), tanba kauza moras strok Hemorasia, mate iha tuku 5:25 dadersan.
“Veteranus Dudu mai baixa iha HNGV iha loron 10 fulan Abril ho diagnostiku strok Hemorasia, liafuan medis nian katak Hemorasia iha nia kakutak, sekundariu hipertensaun no baixa iha ne’e durante semana tolu ho balun no ohin dader tuku 5:25 hakotu iis iha sala ICU HNGV,” hatete Diretor Servisu Apoiu Diagnostiku Terapiutiku iha HNGV, Vidal de Jesus Lopes ba jornalista sira iha nia knaar fatin HNGV, Kuarta (07/05/2025).
Nia dehan, ho kazu strok Hemorasia nee laos mediku ida deit mak atende, maibe ekipa husi multi disiplinariu kompostu husi espesialista neulorolojista, intesivista, kardilojista rekomenda no halo diskusaun entre multi disiplinariu nee deside katak kondisaun seidauk estabiliza atu halo transferensia ba rai liur, tanba Hemorasia ba nia kakutak aumenta.
“Depois ultima ora nia halo intubasaun risku ba Hemorasia iha nia kakutak makaas, entaun ita nia mediku sira mos halo konsultasaun ho mediku sira iha rai liur hanesan Singapura, Australia, Malazia no Indonezia atu husu esperiensia ka opiniaun sira nian, entaun sira mos rekomenda katak pasiente ho kondisaun hanesan nee sira rekomenda la buat barak, sira husu atu halo tratamentu konservativu deit, tanba pasiente nee uza ona ventilador,” nia esplika.
Nia informa, antes nee kauza moras hipertensaun Hemorasia, depois ida nee Hemorasia kakutak aumenta makaas, nunee kazu sira hanesan nee pursentu kiik atu salva, tantu iha ne’ebé deit, tanba nee komplikadu liu ona.
”Esforsu mediku halo hotu ona, liu-liu medikamentu no rekursu umanu hanesan espesialista sira oferese hotu sira nia aan atu halo tratamentu diak, maibe ikus ita la konsege salva nia vida,” nia informa.
Entretantu Veteranu Ernestu Fernandes “Dudu” mate ho idade 79, matebian husi Munisípiu Ermera, oan hamutuk nain sia (9) husi nee mane 6 feto 3.
Tuir obsrrvasaun iha Mortuariu HNGV katak, depois veteranu Dudu hakotu iis vizita mai husi Visi Primeiru Ministru no Ministru Koordenador Asuntu Sosiais Mariano Assanami Sabino, Tenente Jeneral Reformadu Lere Anan Timur, Sekretariu Estadu Veteranus Cesar do Santos da Silva, membru Deputadu sira inklui membru F-FDTL no familia matebian.
(jen)
