DILI, STLTIMORLESTE.com – Prezidente Republika (PR), Jose Jamos Horta husu deskulpa ba veteranus sira neebe agora daudaun forma linha naruk hodi simu pensaun sobrevivensia no sena malu makaas, maibe nia parte labele kritika, tanba Governu servisu barak.
Prezidente Republika Jose Ramos Horta hatoo liafuan nee ba jornalista sira iha Palasiu Prezidensial Nicolau Lobato, Bairo Pite, Tersa (16/12/2025).
“Nee hau haree deit iha media la akompanha direita, tanba nee la komenta tanba prosesu nee mos todan los ba governu. Nee duni bele komprende sira bee hamriik iha neeba hein, hein frustasi no stres ita komprende husu deskulpa ba sira maibe hau mos la kritika fali instituisaun tanba servisu barak i todan,” dehan Prezidente Republika.
Horta, dehan Ministru Veteranus Gil da Costa Oan Soru, nia vetaranus nia laos politiza buat ruma, tanba nia inklina aan luta hahu idade kiik labarik iha foho, tanba nee nia komprende problema sira nee.
Tuir nia, lolos nee la devia bolu veteranus husi Munisipiu hotu mai iha nasional, maibe halo iha kada munisipiu.
“Mesmo iha munisipiu maibe o hela iha aldeia, nee dook los husi instituisaun. Hanesan BNCTL sira ba too iha Baguia neeba, too Maliana neeba nusa laharee buat sira nee. Sistema eletroniko dizital sira nee, mais dada ema mai hotu Dili neemak hau hakfodak mais pronto hau lakohi kritika,” dehan Horta.
Liga ho assuntu nee antes nee mos membru Parlamentu Nasional (PN), preokupa ho prosesu pagamentu ba pensaun tanba veteranu no kombatente sira tenki forma iha lina neebe naruk hodi simu sira direitu.
Jornalista: Emerenciana Pinto
Editora: Domingas Gomes
