DILI, STLTIMORLESTE.com – Delegasaun husi Veteranus Persatuan Purnawirawan Tentara Nasional Indonezia (TNI) Angkatan Darat halao vizita ba iha kuartel Jeneral FALINTIL-Forsa Defeza Timor Leste (F-FDTL), hodi hametin lasu kooperasaun amizade nian.
Iha vizita nee, delegasaun hirak nee simu direita husi funu nain Xefe Estadu Maior F-FDTL, Tenente Jeneral Domingos Raul “Falur Rate Laek” no halo mos enkontru durante oras balu nia laran.
Xefe Estadu Maior F-FDTL, Tenente Jeneral Falur Rate Laek konsidera katak, vizita husi veteranus TNI nee hanesan parte ida atu konhese fila-fali malu, hafoin fahe malu iha funu tinan 24 nia ba independensia Timor Leste nian.
“Ita mai konhese fila-fali malu, atu konhese malu katak, istoria halo Timor Leste nee ita hotu hamutuk mak halo istória, lakon ita mak lakon, manan mos ita mak hamutuk,” hatene Xefe Estadu Maior FALINTIL-Forsa Defeza Timor Leste (F-FDTL ), Tenente Jeneral Domingos Raul “Falur Rate Laek” ba jornalista sira iha Kuartel Jeneral F-FDTL Fatuhada, Dili, Kuarta nee (08/10/2025).
Falur dehan, istoria funu nian sai hanesan ona memoria hodi hatutan ba jerasaun tuir mai, tanba nee hamutuk hotu-hotu selebra susesu independensia, nune’e oinsa hateke ba oin ba distinu nasaun no povu nian entre nasaun rua.
Nunee, iha biban hasoru malu nee, Xefe Estadu Maior F-FDTL nee lansa mos idea balu ba veteranus TNI nian, oinsa kria kooperasaun forti liu hodi servisu hamutuk.
“Hau ohin lansa tiha ona idea katak, ami nia asosiasaun F-FDTL kria daudaun ona, neebe ami hakarak servisu hamutuk nafatin ho sira, para depois ita hadia, ami nia hanoin pareser ba poder desidor deside distinu rua nee nian”, nia fundamenta.
Nia hatutan, hanoin no pareser ne’ebe F-FDTL fo ba iha sira iha setor barak, ligadu ba defeza no militar nian no sira seluk tan neebe lori benefisiu ba nasaun nian.
Iha fatin hanesan, Major Jeneral TNI Purnawirawan, Kamaruddin Simanjuntak konsidera katak, sira nia vizita ba iha kuartel F-FDTL furak no importante tebes atu kria unidade no amizade.
“Ami mai iha nee hasoru malu ohin loron nian nee diak tebes. Ami delegasaun mos apresia ba Jeneral F-FDTL nian hamutuk ho povu sira tun direita ba bundaran simu ami ho diak tebes”, nia dehan.
Nia hakuir katak, los duni iha istoria funu durante tinan 24 nian iha tempu Timur-Timur nian, pozisaun husi Indonezia nian diferente, maibe hotu-hotu hamutuk esforsu tantu husi Timor Leste no Indonezia.
“Maibe ohin ita hasoru malu no tur hamutuk hanesan persahabatan ka belun diak. Tanba nee espera katak, ho hasoru malu nee sai terkenal hodi haree husi jerasaun foun husi Timor Leste no Indonezia di’ak ba futuru,” nia afirma.
Jornalista: Jeniche da Costa
Editor: Xisto Mendonça
