BAUKAU, STLTIMORLESTE.com – Veteranus Fernando “Beredu’u” Gusmão la konkorda bala musan ho bidon mai Timor Leste, tanba konsidera ilegal no potensialidade hamosu funu.
“Ami veteranu preokupa, veteranu halo funu hotu ona maibe hatama tan bala musan nee kria funu, veteranu la konkorda ho ida nee,” hateten Beredu’u iha Vila Antiga Baukau, Tersa (14/10/2025).
Veteranu tinan 24 nee katak, asaun hatama bala musan ho bidon mai Timor Leste nee konsidera ilegal, tanba nee husu Autoridade Seguransa investiga klean kazu refere hodi prosesu autor prinsipal tuir dalan justisa Timor nian, tanba nee konsidera krimi organizadu potensialidade kria instabilidade iha Timor Leste.
“Ami Konselhu husu Polisia tenke kaer, nee krimi, nee kria instabilidade iha Timor bele soran ema oho malu, tenke kaer,” Beredu’u sujere.
Relasiona bala musan mai Timor Leste ho bidon, Veteranus nee mos husu Governu aumenta seguransa masimu iha fronteira no pontu entreda hanesan Aeroportu no Portu hodi prevene importasaun kontra bandu mai Timor Leste.
Jornalista: Tomas Reis
Editor: Xisto Mendonça
