DILI, STLTIMORLESTE.com – Diretor Servisu Apoiu Diagnostiku no Terapeutiku iha Hospital Nasional Guido Valadares (HNGV), Vidal de Jesus Lopes rejeita total informasaun neebe espalha iha media sosial katak, Arte Marsiais sira tama HNGV hodi buka pasiente atu oho, nee informasaun la loos, Arte Marsiais sira mai barak nee tanba sira nia maluk ida mate iha HNGV.
“Informasaun dehan hodi kalan ema halo konfrontu iha Hospital laran nee la loos, ema mai haree ema nia kolega ida neebe mate iha sala Mortuariu,” hatete Vidal ba jornalista sira iha Hotel Timor Dili, Kuarta (12/03/2025).
Nia dehan, situasaun iha HNGV vizita mai barak, relasiona ho pasiente neebe mak mate iha Sala Mortuariu, ho nunee matebian nia família no kolegas sira mai barak.
“Ita nia maluk pasiente neebe mate nee husi Arte Marsiais, kuandu nia mate nee nia maluk sira mai, tanba antes nia moras nee nia kolega sira mak mai haree nian, laos mai halo konfrontu iha hospital laran lae,” nia esplika.
Nia dehan, HNGV iha seguransa neebe hamutuk ho Polísia Nasionál Timor Leste (PNTL) hodi fo seguransa iha neeba.
“Hospital iha segurasan, iha mos polisia iha neeba, nee segurasan internal seguransa HNGV nian no apoiu mos husi PNTL, laiha konfrontu, soke ema barak mai mate nee entaun sira hanoin nee konfrontu,” nia deklara.
Iha fatin hanesan, Fontes Konfirmadu iha Farmasia Emerjensia HNGV esplika, kalan nee pasiente ida mai baixa iha sala bedah laki, maibe iha kalan nee mate, tanba nee Grupu Arte Marsiais sira mai barak hodi lori sira nia maluk matebian nee.
“Loos duni katak, hodi kalan pasiente ida mate nee husi PSHT nian no nia iha sala bedah laki, depois lori ba sala Mortuariu, nee mak nia maluk sira mai hodi haree, laos buka pasiente hodi oho, tanba nee ita labele fiar media sosial sira, neebe sempre inventa sasan, halo publiku paniku,” nia deklara.
Nunee mos Komandante PNTL Munisipiu Dili, Superentendente Xefe Polisia, Orlando Gomes dehan, laiha informasaun kona-ba konfrontu iha Hospital Nasional GuGuido Valadares (HNGV).
“Sei iha konflitu ita nia membru PNTL sira iha neeba bele pasa informasaun mai, maibé laiha,” nia afirma.
(jen)
