VIKEKE, STLTIMORLESTE.com – Daudaun nee Munisípiu Vikeke rejistu ona kazu pozitivu HIV-SIDA hamutuk 23 no iha labarik tinan 5 lakon vida tanba pozitivu HIV-SIDA.
Nia dehan, kona-ba kazu pozitivu HIV-SIDA iha Munisípiu Vikeke 16 neebe evakua husi Hospitál Nasionál Guido Valadares (HNGV) no nain 7 husi Hospitál Horex Baukau hamutuk nain 23 pesoas husi numeru nain haat mak mate.
“Ita iha pasiente ho pozitivu 23 pesoas husi numeru iha nain 4 mak mate ona, inklui labarik ho idade tinan 5,” hatete Xefe Programa HIV-SIDA iha Munisípiu Vikeke, Joãojinho Viana ba STL iha Sede Suku Maloru, Segunda (28/07/2025).
Nia esplika, husi numeru nee iha nain 2 mak ses husi tratamentu sira tanba halai tiha ba Indonézia, maibe sira konsege halo tratamentu durante fulan neen.
“Maibe ita nia Ministériu Saúde hamutuk ho INCSIDA ita halo kedas linha koordenasaun ho Indonézia, sira mos kontrola husi parte Indonézia nian hodi halo tratamentu iha neeba,” nia deklara.
Iha fatin hanesan, Xefe Suku Maluro Bendito Soares informa, gradese ba INCSIDA tanba konsege mai iha Suku Maluro, tanba Xefe Suku nee rekonhese katak komunidade menus liu formasaun kona-ba moras HIV-SIDA.
“Ami agradese tebes ba INCSIDA bele too ami nia fatin hodi fahe informasaun kona-ba Virus HIV nee ba ami nia komunidade, ita haree barak mak seidauk komprede saida mak HIV no SIDA, tanba nee numeru pasiente sempre aumenta, sei sira hatene no komprende, sira bele halo prevensaun ba moras nee,” nia informa.
Nunee mos Juventude Evazelino Ximenes hatete, komunidade presiza duni informasaun sira hanesan nee, tanba ema moras HIV-SIDA iha Munisípiu Vikeke 23.
“Ita haree numeru 23 nee numeru neebe sente aas ona, tanba ida nee rejistu no hasai raan mak ida nee, ita la hatene sira neebe seksu livre no ransu livre neebe seidauk teste raan, tanba nee ba hau informasaun nee importante tebes ba ami komunidade Suku Maluro,” nia afirma.
(jen)
