DILI, STLTIMORLESTE.com – Violensia Domestika aktu nebee la diak, tanba nee iha futuru presiza halao prevensaun hodi redus numeru neebe iha.
“Violensia aktu neebe la diak no barak liu akontese iha familia uma laran, mai ho nia motivu neebe la hanesan, ba futuru oinsa mak bele halo prevensaun ba krimi nee,” dehan Jurista Jose Maria Guterres ba STL iha Kaikoli, Kinta nee (06/01/2025).
Nia hatutan, krimi nee akontese barak iha familia uma laran, mai ho nia motivu la hanesan, balu kauza husi teknolojia, balu mos mai husi ekonomia uma laran.
Atu halo prevensaun iha futuru presiza sosializa lei Violensia Domestika too iha baze, atu ema hotu bele hatene katak, Violensia Domestika aktu neebe la diak no lei bandu. Presiza mos iha hanoin balu husi Igreja ba sarani sira atu moris tuir sarani hodi bele hadook aan husi hahalok neebe la diak.
Iha fatin ketak, Akademiku Universidade Nasional Timor Lorosae (UNTL), Sebastião dos Santos dehan, inan sira neebe hasoru violensia lalika tauk atu hatoo keixa, tenke barani hatoo keixa.
“Labele tauk atu hatoo keixa, maibe barani atu hatoo keixa, tanba ohin loron lei iha atu regula aktu ida nee, no ema hotu hakarak moris iha pas, laos moris iha aktu violensia nia laran,” dehan nia.
(jen)
