DILI, STLTIMORLESTE.com – Jurista Timoroan, Jose Maria Guterres konsidera Violensia Domestika hanesan aktu ida neebe la diak, tanba nee tenke halo prevensaun liu husi lei sira neebe iha ona.
“Aktu ida neebe la diak tenke halo prevensaun tuir lei sira neebe iha, tanba husik deit ikus mai bele akontese fali ba krime sira neebe grave,” dehan Jurista Jose ba STL iha Tribunal Dili, Segunda nee (18/11/20240.
Nia hatutan, uluk feen laen baku malu dehan problema familia, maibe ohin loron lei iha ona atu regula aktu sira nee hodi halo prevensaun.
Ezemplu hanesan laen ida baku feen dala ida diak liu lori ba Tribunal atu hetan desizaun ruma, hodi laen nee labele pratika tan aktu nee iha futuru. Se baku dala ida husik hela deit, laen bele toman ona ho aktu nee, ikus mai baku makaas bele akontese too fali krimi grave.
Iha fatin ketak, Akademiku UNTL, Rafael de Jesus dehan, inan balu komesa barani hatoo keixa bainhira hasoru violensia, maibe balu tauk tanba dependensia ekonomia ba mane.
(ter)
