DILI, STLTIMORLESTE.com – Polisia Nasional Timor Leste (PNTL) iha semana ida nia laran husi loron 21-27 Julhu 2025, rejista liu husi sistema jestaun insidente rejista kazu hamutuk 61 no kazu violensia domestika nafatin aas kompara ho semana ida kotuk husi loron 14-20 Julhu 2025.
Portavoz Seguransa Ministeriu Interior, Superintendente Polisia, Joao Belo dos Reis hatoo lia hirak nee liu husi konferensia imprensa semanal neebe halao iha Edifisiu Ministeriu Interior, Kaikoli, Dili, Kinta (31/7/2025).
Nia hatete, durante semana referidu, situasaun seguransa nasional jeralmente kontinua estavel ho kontrolu efisiente husi instituisaun PNTL ho koperasaun maximu husi autoridade hodi ajuda iha prevensaun konfiltu nivel lokal nian.
“Polisia kontinua realiza patrulamentu, vijilansia no prevensaun hodi kombate krime konvensional, organizadu no krime transnasional. Operasaun hirak neebe polisia halo konsege detekta no prevene aktus ilisitus krime sira nee hanesan, vijilante no asegura aktividades kompetisaun desportivus CPLP lao ho diak husi inisiu too remata. Halo atuasaun ba fatin balun neebe konsidera fasilita explorasaun seksual iha Dili laran no hapara transportasaun sasan kontra bandu husi fronteira tama mai iha Kapital Dili, detekta no preven movimentus sidadaun balun neebe halo tentativa hakat fronteira ho ilegalmente,” hatete Joao Belo.
Tuir nia, husi 61 kazu neebe PNTL rejista, kazu violensia domestika nafatin as hamutuk 19, kazu asaltu 14, abusu seksual/asaltu seksual 7, furto 5 no arma branka 3. Nunee, fo hanoin ba publiku no instituisaun relevantes ba asuntu violasaun domestika atu bele kopera malu hodi fo atensaun relasionadu estratejia prevensaun violasaun domestika iha Timor Leste.
Kona ba dadus asidente tranzitu Rodoviaria, Portavoz Joao Belo hatete katak durante semana ida nia laran, Polisia Tranzitu no seguransa Rodoviaria rejista kazu asidente hamutuk 33 ho total vitima kanek kmaan, kanek todan 5 no mate 2.
Nia dehan, fatores prinsipal neebe kontribui ba asidente sira mak kondutor la iha esperiensia, kondisaun transporte la diak mais obriga nafatin, velosidade la kontrola no konsumu alkohol wainhira kondus transporte.
Kona ba Infrasaun ba Kodigu Estrada, Portavoz Joao Belo esplika katak atu regulariza movimentu transporte iha estrada publiku Polisia Trazitu no Seguransa Rodoviaria mos halo fiskalizasaun ba utilazador estrada publiku sira hodi prevene asidente no impoin kodigu estrada ba utilazador sira hotu.
Husi rezultadu fiskalizasaun nee, Polisia Tranzitu rejista kazu infrasaun hamutuk 526 kasus husi kondutores no motorista sira mak hanesan, transporte governu 5, transporte privadu 485, transporte publiku 36.
“Tipo infrasaun neebe komete husi kondutores ka motorista sira mak henesan, la lori dokumentu kompletu, la iha karta kondusaun, la uza sintu seguransa, asesore la kompletu, stasiona no ilegal, kondus ho influensia alkohol, la uza kapasete, kontra ordem autoridade no sira seluk tan,” tenik Joao Belo.
Nia mos informa kona ba reseita husi infrasaun Tranzitu ba kaixa estadu. Husi piskalizasaun no operasaun neebe Polisia Tranzitu no Seguransa Rodoviaria halo hodi kontrola movimentu transporte iha viasaun publiku, Polisia Tranzitu husi nasional too postu rekolla reseitas hodi remete ba kaixa estadu husi infrator sira ho numeru infrasaun hamutuk US$ 20. 987,00.
Sirkulasaun transporte estranjeiru pessadu no lizeiro hamutuk 325. Husi nee, Polisia Tranzitu rekolla husi movimentu transporte estranjeiru neebe tama no sai tritoriu Timor Leste iha fronteira trestre hamutuk US$ 4.831,00.
Nunee mos dadus husi servisu migrasaun neebe kontrola no resjista movimentu ema estranjeiru tama no sai teritoriu Timor Leste no reseitas neebe rejista US$ 22.780 mai husi multas neebe aplika ba visitantes sira.
(mik)
