DILI, STLTIMORLESTE.com – Violensia Bazeia ba Jeneru nee problema direitus umanus no dezafiu ba dezanvolvimentu nasaun nia.
Tuir Diretor Jeral Protesaun Sivil MSSI, Florencio Pires Dias Gonjaga dehan, oras nee feto no labarik nafatin sai vitima ba kazu violensia bazeia ba jeneru, no violensia nee sai hanesan problema direitu umanus.
“Violensia bazeia ba jeneru sai nafatin problema direitus umanus no dezafiu ba dezenvolvimentu iha ita-nia nasaun. Ita hatene katak kuaze feto ida husi feto tolu iha Timor-Leste esperiensia ona violensia iha sira nia moris. Feto hirak nee, mak ita-nia inan sira, alin-feto sira, oan-feto sira, no belun sira neebe ita tenke proteje sira nia seguransa, dignidade no futuru,” dehan nia liu husi diskursus iha Hotel Timor, Kinta (20/11/2025).
Nia hatete, workshop nuudar oportunidade importante atu fahe esperiensia sira, identifika dezafiu, no importante liu dezenvolve asaun konkreta sira hodi hametin sistema jestaun kazu violensia bazeia ba jeneru iha Timor Leste. Nunee bele kontribui ba asegura katak vitima/sobrevivente ida-idak simu kuidadu ho kualidade aas, komprensivu, no kompaixaun husi primeiru too rekuperasaun, no hetan justisa.
“Hau hakarak reafirma Ministeriu nia kompromisiu ami sei kontinua atu hametin koordenasaun iha setor hotu-hotu no membru rede referal sira, investe iha reforsa kapasidade tekniku sosial no jestor kazu sira, asegura aplikasaun konsistente husi prinsipiu sira neebe sentradu iha sobrevivente sira seguransa, konfidensialidade, no konsentimentu informadu, no servisu besik ho parseiru sira hotu atu alina ami nia esforsu sira ho planu asaun nasional kona-ba VBJ 2022-2032.,” dehan nia.
Nia hatete, sira nia lideransa prontu atu apoia solusaun inovativu sira, inklui ferramenta dijital, agora atu iha tan Linha Solidaria 116, sistema supervizaun, no mekanizmu responsabilizasaun neebe forte. Tanba sobrevivente sira merese sistema ida neebe rona, proteje, no responde ho efetivu.
Nia hatutan, hamutuk laos deit atu diskute problema, maibe atu trasa asaun pratika, koordenada neebe sei halo diferensi loloos iha sobrevivente sira-nia moris iha Timor-Leste laran tomak.
Jornalista: Emerenciana Pinto
Editora: Domingas Gomes
