DILI, STLTIMORLESTE.com – Tuir informasaun neebe viral iha Media Sosial katak dalan iha sidade Dili taka hotu, tanba nee Komando Polisia Nasional Timor Leste (PNTL) konsidera ida nee informasaun nee la loos ka hoax, tanba bazeia ba planu seguransa katak sei fo seguransa masimu iha fatin Tasi-Tolu, atu nunee sarani sira bele omenajen ba Sua Santidade Papa Francisco nia mate.
“Aban sei realiza misa iha Tasi-Tolu, hau hakarak fo hatene ba publiku katak, ita rona informasaun neebe mak viral iha MedSos kona-ba atu taka dalan provizoriu iha Dili laran, tanba nee Komando Munisipiu Dili hakarak hatete katak informasaun sira nee la loos, informasau nee hoax ka falsu,” hatete Komandante PNTL Munisipiu Dili, Superintendente Xefe Polisia Orlando Gomes ba jornalista sira liu husi konferensia imprensa iha Komando Jeral PNTL, Dili, Sesta (25/04/2025).
Nia dehan, PNTL aban sei halo seguransa masimu iha fatin Tasi-Tolu. “Ita sei asegura ita nia sarani sira tomak atu livre hodi ba tuir misa iha Tasi-Tolu,” nia esplika.
Nia informa, aban sei misa iha Tasi-Tolu, iha loron Sabadu (26/04) tinan 2025 hodi fo omenajen ba Sua Santidade Papa Francisco nia mate. Tanba nee transporte sira para hotu iha tasi ibun Tasi-Tolu nian.
“Kuandu transporte sira para nakonu ona iha tasi ibun, ita sei iha alternativu seluk para nakonu ba para fali karreta no motor iha aeroportu ninia,” nia deklara.
Nia hatutan, Komando PNTL Munisipiu Dili sei la blokeia estrada hotu-hotu iha sidade Dili, maibe sei koloka membru sira iha dalan tuir planu seguransa neebe iha ona.
“Komandu Munisípiu Dili sei la taka dalan iha sidade, maibe ita koloka membru sira iha dalan tuir planu seguransa nian neebe mak iha, para atu asegura transporte sira ba hotu iha Tasi-Tolu no sei asegura ita nia sarani tomak atu nunee bele partisipa masimu iha misa,” nia deklara.
Nia afirma, Komando PNTL Munisipiu Dili sei hetan apoiu husi Unidade Espesial Polísia (UEP), Unidade Polísia Marítima (UPM), Unidade Patrulhamentu Fronteira (UPF) no Komando Jerál rasik atu nunee Komando PNTL Munisipiu Dili mak sei jere seguransa durante misa iha Tasi-Tolu.
Iha fatin hanesan, Akademista Universidade Nasional Timor Lorosae (UNTL), Adérito da Silva deklara, seguransa ba loron 26 fulan Abril nee importante tebes ba sarani tomak, tanba atu fo omenajen ba Sua Santidade Papa Francisco nia mate.
“Papa aban hakoi ona, tanba nee ita periza tebes halo misa iha fatin Tasi-Tolu, tanba uluk nia mai vizita TL primeira vez nia halao misa iha neeba, entaun ita atu fo omenajen ba Sua Santidade Papa Francisco nia mate mos iha fatin neeba duni, tanba nee ita husu ita nia membru PNTL tenke fo seguransa neebe masimu ba ita hotu, atu nunee misa nee lao ho diak,” nia afirma.
(jen)
