DILI, STLTIMORLESTE.com – Provedor Direitu Umanu no Justisa (PDHJ), Virgilio da Silva Guterres dehan, iha tinan ida tinan rua nee violasaun direitu umanu ema haree ho matan momos liu-liu iha parte eviksaun nian neebe akontese iha Dili no Baukau.
Nia dehan, muda komunidade sira husi fatin neebe sira faan ba merkadu foun la iha kondisaun, iha Dili ekipa konjunta estraga populasaun sira nia sasan, baku vendedor, iha ema balu lakon sira nia fatin atu hela, lakon sira nia fatin atu faan sira nia sasan, ida nee violasaun direitus humanus neebe ita nia estadu halo, inklui envolvimentu Militar.
“Inklui mos envolvimentu Militar nian iha prosesu despezu administrativu sira neebe halo, buat neebe iha demokrasia nia laran, Militar labele envolve iha prosesu despezu administrativu,” dehan PDHJ, Virgilio ba jornalista sira iha Timor Plaza, Segunda 02/12/2024.
Tanba nia konsidera ida nee hanesan violasaun direitu umanu, bele dehan nia grau sae oituan kompara ho tinan sira seluk.
Iha fatin ketak, Komunidade Suku Komoro, Simiao dos Santos dehan, governu tenke trata komunidade sira ho dignu, labele uza forsa hodi halo violasaun hasoru komunidade sira.
Tanba ohin loron komunidade barak mak moris ho fan sasan, husik sira buka sira nia moris, importante tenke moris ho saude neebe moos, labele soe foer arbiru banhira faan sasan hotu, koordena malu atu limpeza hodi labele halo fatin neebe sira faan sasan ba nakonu ho foer.
(ter)
