MALAZIA, STLTIMORLESTE.com – Tuir komunikadu neebe STL asesu iha Media F-FDTL nia katak, Vise Xefe Estadu Maior Jenerál FALINTIL-Forsa Defeza Timor Leste (F-FDTL) Majór-Jenerál Calisto Santos “Coliati” reprezenta Xefe Estadu Maior Jeneral FALINTIL – Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” hodi partisipa iha enkontru ho Xefe Forsa Defeza husi nasaun ASEAN.
Vise Xefe Estadu Maior Jenerál FALINTIL-Forsa Defeza Timor Leste (F-FDTL), Majór-Jenerál Calisto Santos “Coliati” partisipa iha enkontru Xefe Forsa Defeza ASEAN nian ba dala 22 (ACDFM) iha Kuala Lumpur, Malázia, hahú husi loron 9 too 12 Setembru 2025.
Fórum seguransa rejionál ho nível aas nee halibur Xefe Forsa Defeza sira husi Estadu-membru ASEAN nian, inklui Timor Leste, hodi troka perspetiva no hanoin kona-ba kooperasaun multilaterál hodi responde ba dezafiu sira seguransa rejionál nian.
Iha ninia intervensaun, Majór-Jenerál Coliati expressa katak, nuudar Estadu observadór, Timor Leste rekonhese ho interese partikulár ASEAN nia kapasidade neebe hatudu ona ba rezolusaun konflitu, hanesan evidensia iha mediasaun disputa fronteira Kamboja-Tailándia foin lalais nee. Realizasaun ida nee reprezenta avansu substansial iha arkitetura seguransa rejional, neebe halo balansu ho efetivu bála prinsípiu la interferénsia ho envolvimentu pragmátiku ba estabilidade rejionál.
Nia esplika katak, F-FDTL nafatin dedika no esforsa aan atu aprende no servisu besik ho omólogu sira ASEAN nian hodi hametin reziliénsia rejionál hasoru dezafiu seguransa nian neebe evolui ho ritmu lalais.
Majór-Jenerál Coliati iha oportunidade halao mos reuniaun bilateral ho Jenerál Tan Sri HJ Mohd Nizam Bin HJ Jaffar, Xefe Forsa Defeza Forsas Armadas Malázia nian nu’udar uma nain ba ACDFM, nunee mos ho Jenerál Vong Pisen husi Kambódia.
Entretantu tinan oin Forsas Armadas Filipina nian mak sei sai uma nain ba ACDFM ba dala 23 iha Manila iha Maiu 2026.
Jornalista: Jeniche da Costa
Editor: Xisto Mendonça
