AMBENO, STLTIMORLESTE.com – Visi Governador Nusa Tenggara Timur (NTT), Joni Asadoma husu ba Governu Timor Leste (TL) ho Indonezia atu rezolve lalais ona problema segmentu Naktuka Postu Administrativu Nitibe ho Bijaelasunan Postu Administrativu Pasabe, Rejiaun Administrativu Espesial Oekusi-Ambeno (RAEOA).
Visi Governador NTT, Joni Asadoma liu husi ninia deskursu iha ambitu re-ativu Postu Integradu Oesilo-RAEOA ho Napan Timor Tengah Utara (TTU) iha Postu Napan-Indonezia, Kinta (10/04/2025).
Ohin ita hamutuk iha fatin nee hodi re-ativu Fronteira Oesilo nuudar odamatan ba movimentu ema no sasan tama sai liu husi odamatan legal nasaun Indonezia ho TL hodi hametin relasaun povu no hamoris ekonomia povu iha Fronteira, maibe kestaun Fronteira sei iha segmentu rua mak seidauk rezolve, tanba nee husu ba ukun nain sira husi Nasaun TL ho Indonezia atu rezolve lalais segmentu rua nee, ida iha Bijaelasunan no ida fali iha Naktuka, nunee povu rai rua nee bele hametin liu tan sira nia relasaun diak iha Fronteira,” dehan Visi Governador NTT, Joni Asadoma.
Iha oportunidade hanesan, Prezidente Autoridade RAEOA, Rogerio Tiago de Fatima Lobato dehan, kestaun Fronteira neebe levanta husi Visi Governador NTT, hanesan Autoridade RAEOA sempre iha esperansa atu rezolve problema nee lalais atu nunee bele loke ona Postu Integradu iha Naktuka.
“Ita nafatin iha esperansa atu nunee problema segmentu rua iha Bijaela Sunan Pasabe ho Naktuka tempu badak sei rezolve. Hau fiar katak maun Boot Primeiru Ministru, Kay Rala Xanana Gusmão ho Prezidente Indonezia, Prabowo Subianto, neebe iha relasaun diak, tanba Prezidente Prabowo iha relasaun emosional neebe diak ho TL iha tempu naruk nia laran no nia sempre dehan TL iha ninia fuan, tanba antes nee iha Prezidente Suharto, Prezidente B.J Habibi, Prezidente Megawari Sukarno Putri, Prezidente Sosilo Bambang Yudhoyono no agora Prezidente Prabowo Subianto, sempre iha komitmentu boot hodi rezolve disputa rai iha fronteira no daudaun nee falta deit segmentu rua nee deit ona mak sei iha prosesu diskusaun husi ekipa Fronteira rai rua, espera sei rezolve problema nee husi ukun nain sira,” dehan nia.
(jos)
