BAUKAU, STLTIMORLESTE.com – Vitima dezastre naturais hamutuk 35 iha Postu Administrativu Baguia, Munisipiu Baukau, seidauk hetan apoiu emerjensia husi Autoridade Protesaun Sivil (APC – sigla português).
“Los duni komunidade uma kain 35 iha Baguia seidauk simu, inklui Suku Afaloikai, Defauasi, Larisula, Samalari no Lavateri,” informa Administrador Postu Baguia, Mario Xavier da Silva ba jornalista STL liu husi telefone, Segunda (26/05/2025).
Vitima dezastre naturais refere benefisiariu ba apoiu emerjensia husi Autoridade Protesaun Sivil, tanba afeta ba dezastre naturais neebe akontese iha fulan hirak ba kotuk rezulta uma hela fatin, dapur hetan estragus.
Nia informa, estragus refere rejistu husi Suku Afaloika, Defauasi, Larisula, Samalari inklui Suku Lavateri, neebe Autoridade Protesaun Sivil liu husi pontu vokal Postu rekoilha dadus no relata ona ba APC Munisipal, maibe too ohin seidauk fo apoiu emerjensia.
“Ami nafatin hein se iha karik bele halo distribuisaun, ami esforsu kontaktu ba diresaun neebe iha para tempu badak bele halo distribuisaun iha Postu,” Mario argumentu.
Hatan ba kestaun nee, Komadante Operasaun Autoridade Protesaun Sivil Munisipiu Baukau, Francisco Viana Freitas esplika, iha fulan Fevereiru tinan nee, Autoridade Protesaun Sivil Baukau rejistu afetadu vitima dezastre naturais hamutuk 67 iha Postu Baguia kompostu husi uma hela fatin, dapur no armajen neebe hetan estragus husi udan anin boot.
Maibe husi afetadu 67, vitima 25 simu uluk ona apoiu emerjensia no 42 mak seidauk, tanba konsdisaun iklima, maibe sei fo apoiu iha tempu besik.
“Semana liu ba apoiu ona uma kain 25, semana nee nia laran ami sei apoiu tan 42 familias, tanba dadus iha hotu ona hein para apoiu emerjensia deit,” informa Francisco.
Nia katak, husi vitima dezastre naturais 67 dadaun ekipa halo verifikasaun ba uma hela fatin sira neebe hodi submete ba Nasional simu apoiu material rekuperasaun husi Estadu.
Entretantu Autoridade Protesaun Sivil fo apoiu emerjensia ba vitima dezastre naturais sira mak hanesan food item no laos food item.
(tom)
