DILI, STLTIMORLESTE.com – Bankada FRETILIN kestiona asaun neebe Sekretariu Estadu Assuntu Toponomia Organizasaun Urbana (SEATOU) halo eviksaun hasoru Komunidade balu iha Dili laran, too agora seidauk hetan Indemnizasaun.
Tuir Deputada husi Bankada FRETILIN, Veronica Fernandes katak, vitima sira husi eviksaun neebe halo husi SEATOU too ohin loron, maluk sira nee uma hetan sobu ka eviksaun brutal seidauk hetan Indemnizasaun i vitima sira nafatin hela ho família no ema, tanba la kria kondisaun.
“Primeiru Ministru (PM) Xanana, iha debate proposta OJE 2025 haktuir Amu Papa Francisco nia liafuan katak, buat neebe murak no diak liu iha Timor mak povu. Maske PM foti palavra sira nee, maibe iha IX Governu bainhira halo eviksaun lá kria kondisaun, no too agora vitima sira seidauk hetan Indemnizasaun, ida née ladun diak,” kestiona Deputada Bankada FRETILIN, Veronica Fernandes, iha PN Segunda (25/11/2024).
Nia husu governu bainhira hasai komunidade tenke kria kondisaun, ezemplu hanesan inan ida neebe foin partu loron 3 deit iha Bidau Santana, maibe Governu hasai too agora lá kria kondisaun, no laiha autoridade kompatente ka governu atu haree sira nia situasaun.
Nunee mos Deputadu Joaquim dos Santos ‘Boraluli” husi Bankada FRETILIN sublinha, kona-ba kazu eviksaun nee dezde uluk sosiedade sivil sira kritika Governu, maibe rona tiha lakohi halo tuir buat balu neebe loos.
Hatan ba Kestaun nee, Visi Ministru Asuntu Parlamentar (VIMAP), Adérito Hugo katak, kona-ba kestaun neebe deputadu/a sira foti nia parte toma nota, no sei envia bá parte relevante atu halao resposta mais detalhadu.
(gui)
