DILI, STLTIMORLESTE.com – Komandante Esquadra Vera Cruz Inspetor Xefe Ernesto da Costa Guterres hatete, ohin komunidade sira konsentra iha eskuadra Vera Cruz liga ho investimentu neebe ho Kompanhia Raimakmor promete ba sira katak, ohin dia 26/01/2026 atu halo pagamentu sira nia osan neebe antes nee sira hatama atu halo kreditu iha Kompanhia Raimakmor Lda.
Inspetor Xefe Ernesto da Costa Guterres dehan, tuir informasaun neebe mak parte polisia hetan no rekolha husi komunidade sira neebe mak agora daudaun iha liur nee katak, oinsa mak sira bele hola parte iha kompanhia refere, primeriu rejistu ho osan montante US$ 35 kada pesoas, maibé osan ida nee rejistu deit atu nunee bele partisipa iha kompanhia refere, segundu banhira sira rejistu ona sira bele asesu ba iha kreditu.
Nai informa, kreditu nee depende ba sira neebe mak atu kreditu karik ida hatama US$ 100 nia bele asesu ba kreditu semana ida bele hetan montante US$ 100.000, husi montante neebe mak iha entaun atrai ema oinsa mak ema atu fiar no oinsa mak bele fo nia osan, entaun momentu sira fo sira nia esplikasaun ema kontente no sente diak no ema hotu hakarak tama no hakarak atu asesu kreditu refere.
“Ema neebe mak asesu kredit nee laos hatama osan montante US$ 100 maibé ema balu US$ 5000 mos iha balu US$ 300 liu ida nee mos iha, balu faan hotu nia kareta no ai-horis tanba hakarak asesu hotu kreditu neebe mak kompanhia refere esplika ba sira”, hatete Komandante Esquadra Vera Cruz Inspetor Xefe Ernesto da Costa Guterres ba jornalista sira iha nia knaar fatin kaikoli, Segunda (26/01/2026).
Depois ikus mai promete neebe mak sira fo sai nee la sai realidade, tanba ida nee hahu husi dia 12 Dezembru tinan 2025, ema sira nee mai atu levanta problema nee.
“Husi informasaun sira nee oinsa mak ita bele buka parte kompanhia sira atu atendimentu ba sidadaun sira neebe mak mai iha parte polisia nia, liga ho sira nia osan neebe mak sira hatama ba kompanhia”, dehan Ernesto
Nia dehan, iha dia 12 Dezembru tinan 2025, komunidade balu mai hatoo keixa no parte polisia konsege bolu nain ba kompanhia no ikus parte rua aseita malu no sira halo akordu ida katak, ohin dia 26 Janeiru tinan 2026, kompanhia hahu halo pagamentu ba ema neebe mak rejistu primeiru hahu husi dia 12 Dezembru tinan 2025 nee ema hamutuk 92, neebe lo-loos nee ohin ba pagamentu ba ema nain 92 nee, maibé ohin ema mai aumenta tan ida 17 nee.
“Ita nafatin atendimentu depois buka atu komunika ho kompanhia para oinsa mak bele hetan resposta ba ema sira neebe mak agora daudaun iha liur. Entaun maneira neebe mak ita halo mak hahu halo rejistu ba ema neebe mak seidauk rejistu nee, depois mak ita komunika fali ho kompanhia atu mai halo atendimentu ba sira maibé atu selu ou lae ida nee kompanhia nian”, nia informa.
Nia relata, parte rua akordu mak kompanhia la rezolve dalan seluk sei iha mak ema neebe vitima bele halo keixa, keixa iha parte rua, ida keixa iha polisia no ida ita haruka sira diretamente ba keixa iha Ministeriu Publiku nunee prosesu lao ba oin.
Iha fatin hanesan, Vitima Juliano Lopes dos Santos hatete, ohin ami mai iha nee tanba kompanhia ida ho naran Raimakmor mai loke sira nia kompanhia dehan hatama osan US$ 135 ami sei hetan osan 100.000, se ema neebe mak loke bisnis nia bele hatama nia osan ba iha kompanhia Raimakmor bele hetan osan US$ 100.00 hodi fila liman.
“Ami hatama osan nee tanba resivu hakerek BNCTL ho ida nee mak ami fiar no hatama osan, dala barak ema hatete kompanhia nee bosok ten tanba saida imi fiar, ami fiar tanba resivu hakerek BNCTL depois banku BNCTL ba Timor tomak, nomos osan refere rai iha BNCTL”, dehan vitima Julio.
Nia salienta, hatama tiha osan informasaun laiha vitima sira telefone ba kompanhia no sira manda mensajen katak, oras ida nia tun direta atu rezolve maibé nufim kompanhia nain la tun.
“Iha tinan kotuk kompanhia nain promete iha kantor polisia ida nee katak, dia 26 Janeiru tinan 2026 nia atu rezolve iha fatin ida nee no se mak hakarak atu foti nia osan bele foti fali, maibe ami hotu mai iha fatin nee nia laiha”, tenik Julio.
Vitima sira husu nafatin parte seguransa liu-liu Polisia Nasional Timor Leste (PNTL) atu buka kompanhia nain no bele kaer no tenke fo fila ami nia osan refere.
Entretantu vitima sira nee mai husi Munisipiu Ermera, Likisa, Manufahi, Baukau, Manatutu, Dili inklui munisipiu sira seluk.
(jen)
