DILI, STLTIMORLESTE.com – Prezidente Republika (PR) José Ramos Horta vizita privadu ba Australia halo enkontru ho entidade balun, PR hatoo preokupasaun makaas kona-ba kondisaun trabalhador sira nian.
Prezidente Republika hatoo kestaun nee ba jornalista sira bainhira remata vizita privadu ba Australia fila hikas mai Timor Leste iha Aeroportu Internasional Nicolao Lobato, Sabadu (12/10/2024) hatete, durante hasoru malu husi diskursu nia koalia makaas kona-ba direitu trabalhador Timoroan nomos husi nasaun seluk neebe mak halao servisu iha Australia.
PR Horta hatete, klaru Timor kontente, tanba PR Horta rasik mak uluk kedas asumi kargu nuudar Ministru Estranjeiru lobi ho Australia simu trabalhador Timoroan nee importante, maibe iha aspetu balun neebe halo Prezidente rasik la konkorda.
“Problema ida neebe hau foti makaas loos ho Australia mak kondisaun trabalhador sira nian. Klaru ita Timor kontente, hau rasik mak uluk kedas Ministru Estranjeiru halo lobi ho Australia simu trabalhador Timoroan nee importante, maibe iha aspetu balun neebe hau la konkorda, hau koalia makaas.
Informasaun sira nee laos hau simu arbiru lae, nee bazeadu investigasaun, ema barak halo, inklui ita nia Embaixada iha Australia,” dehan PR Horta.
PR Horta hatete, kadaves vensimentu trabalhador simu nee lakon responde vensimentu neebe eziste iha Australia rasik, depois hela fatin nee bele ema nain 8 hela iha kuartu ida kompanhia nian, depois idak-idak simu kuartu individual, mas afinal signifika kuartu nee bele uza US$ 700 semana-semana.
PR Horta esplika, depois transporte mos kada trabalhador mak selu husi nia hela fatin neebe pertense ba kompanhia selu kompanhia, depois tama ba bis ida atu ba selu tan bis nee ba nia fabrika.
Iha biban nee, Prezidente mos aprenzenta ba iha partisipante katak, iha Timor Leste bis neebe husi Governu tula estudante sira la selu.
“Hau hatete ba sira iha Timor ami bis governu nian, universidade nian mos tula ema la selu. Buat sira nee sira simu ho diak, hau halo situasaun iha neeba nakdoko kedas,” hatete PR Horta.
Xefe Estadu hatete, nee trabalhador sira akuza governu, entaun PR hanoin nee sei prepara kondisaun diak liu ba trabalhador sira.
“Laos ita nian deit, trabalhador sira husi pasifiku nian mos, Embaixador Pasifiku nian kontente ho hau nia intervensaun, tanba hau temi trabalhador pasifiku sira nian, sira kontente tanba sira hatene ita boot sira konsege book situasaun iha Australia,” haktuir nia.
Nia haktuir tan katak, la signifika la kontente ho programa trabalhador nian, kontente mais tenke hadia liu tan atu sira bele simu osan boot liu tan mai sira nia família.
“Agora iha Aeroportu hau hasoru balun lubuk ida, sira ferias mai deskansa depois sira sei fila fali ba Australia,” tenik PR.
(eme)
