DILI, STLTIMORLESTE.com – Membru Parlamentu Nasional (PN) simu lamentasaun husi Prezidente Autoridade Munisipiu Lekisa katak, populasaun sira husi Dili ba soe lixu arbiru iha area Kaitehu.
Kestaun nee Deputada Bankada Partidu Demokratiku (PD), Maria Teresa Gusmão hatoo liu husi plenaria iha PN, Segunda nee (17/03/2025).
“Iha Kinta no Sesta semana kotuk wainhira Komisaun F halo fiskalilizasun ba iha Munisípiu Lekisa, Prezidente Autoridade Munisipiu lamenta ho maluk sira neebe halo pasa ferias (piknik) iha Kaitehu, lixu soe hela deit ba rai no sidadaun sira la rekolha lixu ba soe iha lixu fatin,” hatete Deputada Maria Teresa Gusmão.
Nia hatutan, Autoridade Munisipiu Lekisa tau avizu iha area Kaitehu neebe husu komunidade no vizitante sira atu soe lixu tuir fatin neebe prepara ona iha fatin neeba.
“Maibe ita sira husi Dili ba piknik iha neeba soe sasan sira nee arbiru deit, no kada Sesta Feira, Prezidente Autoridade Munisipiu Lekisa ho funsionariu sira tenke ba hamoos lixu iha fatin neeba,” tenik Deputada.
Iha biban nee, reprezentante povu nee mos salienta katak, problema lixu nee dezde uluk Parlamentu Nasional hatoo beibeik ona no Governu uza maneira oin-oin hodi solusiona lixu nee, maibe too agora seidauk bele rezolve.
Tanba nee nia husu Autoridade Lokál sira iha munisipiu, kada semana organiza populasaun sira atu hamoos idak-idak nia suku laran.
“Servisu too ohin loron seidauk bele rezolve, se bele ita servisu ho Xefe Suku ho Xefe Aldeia sira atu organiza populasaun sira iha kada Sesta feira no Sabadu hodi hamoos lixu neebe mak iha,” nia argumenta.
Hatan ba kestaun nee, Vise Ministru Asuntu Parlamentares, Aderito Hugo katak, sei envia preokupasaun deputada sira nia ba iha ministeriu relevante hodi bele tau atensaun.
“Sei envia ba ministeriu relevante sira atu bele resposta preokupasaun husi senhor Deputadu sira,” hatan Vise Ministru Asuntu Parlamentares Aderito Hugo.
(alb)
