DILI, STLTIMORLESTE.com – Suar metan sai fali sai husi xamine Kapela Sistina Vatikanu nia leten, ohin Kinta (8/5). Ida nee hatudu katak seidauk iha Papa neebe eleitu iha votasaun iha loron segundu Konklave (Conclave).
Cardeal eleitor 133 husi mundu tomak hamutuk iha Kapela Sistina atu partisipa iha Konklave hodi hili lider foun ba Katolika sira depois de Papa Fransiskus mate iha loron 21 Abril liuba.
Cardeal sira inisia ona votasaun dahuluk dezde Kuarta (7/5/2025), neebe kontinua ohin tanba seidauk hetan konsensu.
Votasaun rasik bele halao too dala haat, ho votasaun rua iha meudia no votasaun rua iha kalan.
Durasaun Konklave ka eleisaun Papa foun nee depende, iha neebe eleitu iha oras balun deit, maibe iha mos neebe gasta tempu too tinan barak.
Papa Francisco antes nee, eleitu la too loron rua, prosesu lalais deit.
(cnn/ces)
