AMBENO, STLTIMORLESTE.com – Daudaun nee udan monu ona ba rai, Organizasaun Non Govermentais Internasional (ONG) World Neighbors (WN) ho Ministeriu Agrikultura Pekuaria Peskas no Florestas (MAPPF) liu husi Sekretariu Rejiaun Agrikultura Oekusi, iha loron Kuarta (20/11/2024), halao lansamentu kampanha kolheta Udan bee iha Oekusi.
Serimonia kampanha Kolheta bee nee, realiza simbolikamente iha Aldeia Buki, Suku Usi Tasae, Postu Administrativu Oesilo, Rejiaun Administrativu Espesial Oecusse-Ambeno (RAEOA), hahu ho vidu husi labarik Bairru Buki, tara tais no kontinua akompanhia bainaka sira ba fatin serimonia.
Iha oportunidade nee, Programa Manajer NGO Internasional WN, Cornelio Ase liu husi ninia deskursu dehan, WN nuudar organizasaun internasional non-governamental laos lukrativu, servisu iha Timor Leste (TL), liu husi parseiru lokal sira hodi inspira ema no hametin komunidade sira atu hetan solusaun tempu naruk ba hamlaha, pobreza, moras no promove ambiente saudavel.
Nia dehan, liu husi projetu Resilensia Diak Plus (ReDi+) neebe finansia husi Ajensia Estadus Unidus nian ba Dezenvolvimentu Internasional USAID. WN nuudar membru orgaun konsorsiu ho Mercy Corps no Catholic Relieve Services nuudar implementador ba projetu ReDi+.
Objetivu jeral husi programa ReDi+ mak nee, atu uma kain rural sira neebe kiak no vulneravel iha TL, bele sai resiliente liu tan, bainhira hasoru dezastre natural neebe mosu bei-beik, alinha ho elementu espesifiku sira husi Gabinete Asistensia Umanitaria ka Bureau of Humanitary Assistance (BHA) ho nia misaun atu hamenus sofrimentu umanu no hamenus impaktu husi dezastre, liu husi ajuda komunidade neebe presiza atu sai auto-sufisiente liu tan.
Projetu ReDi+ mos sei halao intervensaun, bazeia ba objetivu tolu hanesan Hasae uma kain nia resiliensia ba dezastre natural sira no mudansa klimatika, Hasae produsaun agrikola uma kain sira neebe sensivel ba klima no Hadia meius subsistensia sira, liu husi hasae servisu finanseiru no envolvimentu iha merkadu.
Nia dehan, iha Oecusse, WN halao ona projetu ReDi+ desde tinan 2022, espalha iha Suku 11 inklui Suku prinsipal 4 mak hanesan Suku Usitakeno, Usitasae, Lelaufe, Taiboco nomos Suku hitu sira seluk.
Implementasaun projetu ReDi+ iha area alvu, WN parseria ho NGO lokal tolu, inklui AHCAE, BIFANO no CECEO. Intervensaun balun neebe halao ona mak hanesan Estabelese no treina Komisaun Jestaun Dezastre iha Nivel Suku, Kria dokumentu Planu Kontinjensia no halao simulasaun, Halao asaun adaptasaun no mitigasaun inklui estabele terrasu no trasaun kadalak, Treinu no aplika teknolojia dezenhu resiliensia iha toos uma-hun no dezenvolve toos ai-horis grupu nian.
Nia akresenta tan katak, tuir observasaun WN iha terenu hatudu katak, komunidade sira iha area asistensia, sei hasoru problema falta bee moos husi bee matan neebe iha ona, tantu ba nesesidade uma laran no ba nesesidade agrikultura.
“Iha Oekusi, ita rekonhese katak, pratika halo toos iha rai lolon, halao nafatin ho sistema tradisional, inklui aplika sistema tesi ai no sunu no halo toos muda ba mai, hodi halo nutrisaun rai nian iha rai agrikola sai menus no lakon, halo rai sai krekas no la produtivu ona, entaun implika ba produsaun agrikola iha area foho lolon kontinua tun kada tinan inklui fornesimentu bee-moos menus tebes, iha tempu udan kada tinan akontese erosaun bee iha rai lolon aumenta makaas, nunee bee barak liu suli ba mota laran, ezemplu tempu udan, iha Suku Usitasae, rai bokur bee lori hotu ba mota too tasi.
Atu rezolve problema ida nee, liu husi programa ReDi+, WN hamutuk ho parseiru lokal sira ajuda komunidade hodi harii kaptasaun bee iha nivel uma-kain, nomeadamente iha agrikultor sira-nia kintal. Esforsu ida nee prova ona katak kaptasaun sira nee bele halibur udan been, hasae infiltrasaun bee ba rai laran nomos restaura rai nia bokur. Ho susesu ida nee, WN, hamutuk ho parseiru lokal sira, sei kontinua enkoraja komunidade atu habelar implementasaun konservasaun rai no bee ho foku prinsipal mak kolheta udan-been. Atividade ida-nee hanesan parte ida neebe labele haketak husi planeamentu asaun komunitaria neebe hetan akordu iha inisiu projetu ReDi+ nian hamutuk ho Komunidade alvu sira.
Nia afirma, atividades kolheta udan been nee importante tebes no apropriadu ba komunidade atu halao molok tempu udan too. Atividade kolheta udan-been neebe refere iha nee maka prepara kaptasaun ka kuak absorsaun bee hodi hamenus forsa udan-been sulin tun husi rai lolon sira, habelar no absorve bee ba rai laran. Tekniku konservasaun rai no bee hanesan ida-nee diak tebes atu kolheta no absorve udan-been ba rai okos. Tipu teknolojia kolheta udan-been neebe sei aplika hanesan harii terrasu valeta nian, terrasu hamnasa, terrasu Kaibauk, posu infiltrasaun no harii travasaun kadalak sira.
Objetivu prinsipal husi atividade ida-nee maka: Too fulan-Dezembru 2024 nia rohan, komunidade sira neebe vulneravel ba mudansa klimatika iha Suku Haat (4) efetivamente harii ona kaptasaun bee rihun ba rihun neebe prontu atu kolheta udan-been iha fatin sira neebe hasoru problema bee moos.
Ho kampanha kolheta bee udan nee, esperansa komunidade sira konsiente ona katak kolheta udan-been nee buat importante ida neebe presiza atu promove nafatin. Iha kaptasaun bee nian rihun ba rihun maka harii ona iha Aldeia alvu 6 ba atividade RRD neebe espalha iha Suku 4, inklui Aldeia Nibin di Suku Usitaqueno, Aldeia Pune di Suku Usitasae, Aldeia Buqui di Suku Usitasae, Aldeia Kuatenes di Suku Lelaufe, Aldeia Maquelab di Suku Taiboco no Aldeia Hauboni di Suku Taiboco.
Nia konfesa, WN ho parseiru lokal sira sei involve membru Komisaun Jestaun Dezastre Nivel Suku (KJDS) no lider lokal no agrikultor treinadu sira, hodi enkoraja atividade ida-nee.
Iha oportunidade nee, Diretor Rejional Agrikultura Oecusse, Amaro Efi apresia tebes ho parseiru dezenvolvimentu sira husi ONG Internasional WN hamutuk ONG lokal sira iha Oecusse, realiza kampanha kolheta bee udan atu hamenus erosaun nunee mos bee matan sira iha aera foho lolon labele mate.
“Hau reprezenta Sekretariu Rejional ba asuntu Agrikultura apresia ho prezensa NGO Internasional WN ho parseiru ONG lokal sira hotu iha Oecusse, bele realiza kampanha kolheta udan been, espera povu iha Oecusse nafatin iha konsensia hodi realiza programa nee atu fo benefisiu direita ba povu hotu,” dehan nia.
Nunee mos Xefe Aldeia Buki, Simon Quelo reprezenta komunidade suku Usitasae sente kontente simu programa nee husi NGO Internasional WN atu aplika iha sira nia knua Buki, tanba kada tinan sira sempre preokupa ho udan bee no produsaun aihan sempre menus hela deit.
“Hau reprezenta komunidade iha Oesilo, hatoo agradesimentu ba NGO Internasional WN ho ninia estrutura, bele aplika servisu ida nee iha ami nia bairru, atu konserva bee matan nomos kolheta udan been ba nesesidade ami nian,” dehan nia.
Tuir observasaun STL iha fatin serimonhia kolheta bee, jerente sira husi NGO Internasional WN mobiliza bainaka sira hakat ba toos kolheta udan been ho simu insada, ai suak no lubas, ofisialmente lansa kolheta udan been ho kee rai kuak iha Bairru Buki Faefnome, Suku Usi Tasae, Postu Administrativu Oesilo, RAEOA.
(jos)
