DILI, STLTIMORLESTE.com – Organizasaun Naun Governamental (ONG) World Vision koopera hamutuk ho Organizasaun Lokal sira iha Timor Leste, loke kompetisaun nogosiu nivel kiik ba grupu feto sira, iha Rejiaun Administrativu Espesial Oekusi-Ambeno (RAEOA) no Munisipiu Kovalima.
Projetu no kompetisaun fefere hetan fundus husi Uniaun Europeia, neebe mak foka liu ba RAEOA no Munisipiu Kovalima, tanba projetu nee ho nia objetivu atu bele ajuda atividade feto nian, hodi bele hadia diak liu tan sira vida nogosiu.
Tuir Jerente Operetion World Vision Timor Leste, Umbelino Pereira katak, iha workshop nee halibur autoridade lokal sira hodi fahe informasaun ba komunidade sira atu bele mai hola parte iha kompetisaun negosiu kiik sira.
“Workshop ida nee ami halibur lideransa lokal sira mai iha nee, hodi ami bele fahe informasaun no sira mos bele fahe mos informasaun nee ba komunidade sira, atu sira mai tuir kompetisaun negosiu kiik neebe mak estabelese iha RAEOA no Munisipiu Kovalima,” hateten Umbelino iha Salaun Hotel Novu Turizmu, Dili, Tersa (08/04/25).
Jerente nee reafirma katak, tuir planu orsamentu tinan ida nee projetu foka liu ba iha RAEOA ho Munisipiu ho Kovalima no ba oin iha planu mos atu loke tan ba iha munisipiu sira seluk.
Enkuantu projetu nee hahu tinan ida ona no World Vision servisu hamutuk ho grupu feto hodi empodera feto sira liu husi kapasitasaun iha area oin-oin, nunee tempu ona atu grupu feto sira bele hamosu nia kriatividade, atu oinsa bele hahu sira nia negosiu rasik hodi melhora diak liu tan sira nia negosiu neebe mak iha ona.
Iha fatin hanesan, Administrador Postu Administrativu Pasabe, Paulino Marques hateten, workshop nee importante tebes, World Vision nia prezensa tinan barak ona iha Timor Leste, maibe konsentra deit iha Vila, tanba nee komuniddade sira neebe mak hela iha area rural ladun asesu ba programa sira hanesan nee, no ho workshop nee bele promove nogosiu kiik sira hodi melhora diak liu tan sira nia atividade negosiu neebe mak iha.
(EST 3)
