DILI, STLTIMORLESTE.com – Primeiru Ministru (PM), Kay Rala Xanana Gusmão apresia ba servisu Autoridade Seguransa neebe ho kapasidade prende kilat musan bidon tolu tama iha Timor Leste.
Primeiru Ministru hatoo apresiasaun nee ba Autoridade Seguransa Timor Leste, kompostu husi Servisu Intelejensia Polisia (SIP), Munisipiu Dili, Departamentu Serbisu investigasaun Kriminal (DSIK), Forsa Polisia (FP) no Serbisu Nasional Intelejensia (SNI), neebe identifika kontentor ida iha area Tibar, iha Posto Administrativu Bazartete, Munisipiu Likisa.
Primeiru Ministru Kay Rala Xanana Gusmao hatoo kestaun nee ba jornalista bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nocolau Lobato, Bairo Pite, Kinta (16/10/2025).
“Tanba nee mak ita fokus ba ohin nee buat barak, fokus ba seguransa tanba nee mak diak tebes kuandu sira detekta hasai kedas, lae mak ita nonok. Ita tenke apresia ba esforsu hotu hotu, esforsu husi intelejensia husi alfandega, husi hotu hotu,” dehan nia.
Primeiru Ministru husu nafatin ba parte kompotente atu nafatin tau atensaun, liu liu sira neebe mak hatama sasan mai rai laran nee.
“Hau bolu hela atensaun ba roo metan ida, no bolu atensaun kalan kalan hafuu tok ema ruma ba hasai sasan karik. Problema ida nee mak dala ruma ita hanoin katak ita tuur deit buat nee akontese lae, maibe tenke nafatin ezije ba instituisaun estadu neebe kaer seguransa, atu nunee bele redus kriminalidade, krime trans nasional,” dehan PM Xanana.
Jornalista: Emerenciana Pinto
Editora: Domingas Gomes
