DILI, STLTIMORLESTE.com – Primeiru Ministru (PM), Kay Rala Xanana Gusmão apresia ho Polisa Nasional Timor Leste (PNTL), tanba fo segurasan ba eviksaun neebe Governu halao iha Aldeia Fomento II, Suku Komoro, Postu Administrativu Dom Alexo, Munisipiu Dili, lao ho diak.
“Hau apresia perzensa PNTL nia neebe fo segurasan ba eviksaun,” hatete PM, Kay Rala Xanana Gusmão ba jornalista sira iha Komado Jeral PNTL, Dili, Segunda (13/1/2025).
PNTL tuir Xefe Governu servisu diak tebes, ba segurasan masimu ona iha situasaun neebe governu halao eviksaun iha Sidade Dili.
“Susar atu simu, ita balu mak la simu, mais buat balu mak ita nia joven sira seidauk muda sira nia mentalidade, tanba han soe nafatin lixu, hemu soe nafatin lixu, hodi apelu ba malu hodi rona malu,” hatete Xefe Governu.
Iha fatin ketak, Xefe Suku Komoro, Eligio José Marçal hatete, tuir dadus, eviksaun neebe governu liu husi SEATOU halo afeta ba komunidade nia uma hamutuk 288, xefe familia 257 no membru familia hamutuk 1330.
“Agora estudante barak mos iha neeba, liu husi blanko familia nian nee mak ita hatene. Maibe inan-aman sira dehan oan balu eskola iha foho no balu mak hela ho inan-aman iha nee, tanba nee estudante ensinu baziku primeiru no segundu siklu iha na’in 230, ensinu baziku terseiru siklu iha nain 155, sekundariu 97 no universidade 102, sira nee mak hela iha neeba, balu hela ho ina-aman no balu hela iha kost,” nia esplika.
Entretantu, tuir dadus neebe jornalista STL asesu iha terenu katak, estudante nain 584 sai vitima ba eviksaun neebe governu halo, liu husi SEATOU iha Aldeia Fomento II, Suku Komoro, Postu Administrativu Dom Aleixo, Munisipiu Dili.
(jen)
