DILI, STLTIMORLESTE.com – Primeiru Ministru (PM), Kay Rala Xanana Gusmão hatete, dezenvolvimentu lao iha rai laran maske neineik, maibe firmeza hodi lao ba oin.
Primeiru Ministru Kay Rala Xanana Gusmão hatoo kestaun nee ba jornalista sira bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nikolao Lobato, Bairu Pite, Kinta (12/06/2025).
Primeiru Ministru dehan, lokraik-lokraik nia servisu ba akompanha kompanhia sira neebe hadia ponte iha Kuluhun, maske dezenvolvimentu lao neineik maibe kontinua dudu ba oin ho firmeza tuir planu Governu nia neebe iha.
“Ita lao neineik la halai maibe lao ho firmeza, hau lokraik-lokraik ba haree ponte iha kuluhun neeba, neebe neneik ita sei dudu hadia, Prezidente mos fo lembra nafatin, ami mos semana rua kotuk ba dehan tiha ona ba Ministeriu Justisa no Sekretariu Estadu Terras no propriedade, tanba rai barak mos hakarak mai tan mai tan mais fatin laiha ona ita la kontrola ba planeamentu urbanu tanba lakon tiha kontrola ema halo uma ba too kedas Estrada ema halo buat sira nee hotu, tanba nee mak haree ba ida nee tanba lakon tiha kontrolu planeamentu urbanu mais buka nafatin fatin tanba Singapura mos hakarak mai ema hotu hakarak mai,” dehan PM Xanana.
Aleinde nee Primeiru Ministru Kay Rala Xanana Gusmão mos informa ba Prezidente Republika Jose Ramos Horta katak, PM mos simu Embaixador Japaun ho tekniku sira neebe sei halo fabrika Roo iha Timor Leste.
“Hau informa ba Prezidente katak hau simu Embaixador Japaun ho tekniku sira neebe sei halo fabrika roo sira fofoun nee dehan katak halo iha Laleia mais sira sei estuda keta halo rai la too ou rai ladun diak karik, buat sira nee hotu ita sei muda fali ba Vemasi, se lae karik ba fatin seluk.
Maibe iha fulan Janeiru tinan mai nee fabrika komesa hahu ona, ida nee diak tebes tanba sei fo empregu ba Timor oan rihun haat.
“Mais ita koalia kona-ba fo empregu ba ema rihun haat, hau foin rona, Prezidente uluk kedas lao ho organizasaun ida rai matak, hau foin rona hau hakfodak hau la fiar tiha deit sira dehan hahu husi musan ida afinal kleur tiha ona, sira halo servisu kapaas iha Baguia sira kuda ai liu rihun atus hitu neebe sira kuda tan kuda tan iha neeba, neebe hau dehan nee kapaas tebes,” katak PR Horta.
Bainhira rona Primeiru Ministru dehan ba Prezidente Republika katak, iha V Governu mos Governu hanoin ona ida nee iha Likisa iha fatin para prepara ai oan sira, tanba iha politiku V Governu 1 milhaun de arbores por ano.
Primeiru Ministru dehan, iha hasoru malu nee koalia asuntu barak maibe nia labele fo sai ba media sira depois mak Prezidente Republika mak sei fo sai informasaun.
(eme)
