DILI, STLTIMORLESTE.com – Primeiru Ministru (PM), Kay Rala Xanana Gusmão ohin hasoru malu ho Visi Prezidente Ezekutivu ba Tekniku no Dezenvolvimentu Enerjetiku, Julie Fallon ho tekniku husi Woodside Energy, ho Timor Gap, hakarak lori kadoras mai iha Timor Leste (TL).
Liafuan nee hatoo husi Primeiru Ministru (PM) Kay Rala Xanana Gusmão hafoin remata enkontru ho delegasaun woodsite akonpanha husi (MPRM), Francisco da Costa Monteiru iha sala enkontru Gabinete Fronteira Maritima Palasiu Governu Dili, Kinta nee (31/07/2025).
“Ami hasoru Visi Prezidente Ezekutivu husi Woodside Energy, Julie Fallon mai ho nia kolega barak tekniku sira, mai hasoru malu ho Timor Gap, ba too Suai, ba too Natarbora, hodi komprende ita nia hanoin no hakarak kona-ba lori kadoras mai iha TL,” katak Xanana.
Xanana afirma, enkontru ho nia laos diskusaun tekniku, mais enkontru so para espresa agradese mai TL no agradese ba sira, tanba bele too iha neeba hodi haree no bele komprende ita nia hakarak nee.
“Tanba sira sei kontinua koalia ho Prezidente Timor Gap no Prezidente ANP hotu, neebe sira sei kontinua nafatin, maibe hodi governu no povu nia naran agradese tebes ba vizita ida nee,” sublina Xanana.
Iha fatin hanesan, Visi Prezidente Ezekutivu ba Tekniku no Dezenvolvimentu Enerjetiku, Julie Fallon hatoo obrigadu ba Governu TL, tanba bele simu sira nia ekipa atu servisu hamutuk hodi lori projetu nee ba oin.
“Ami hatoo obrigada barak ba governu hodi simu ami nia ekipa neebe mak diak, no mos ba kolaborasaun neebe ami iha ho Governu TL oinsa atu servisu hamutuk atu avansa projetu ida nee ba oin,” katak Julie Fallon.
Nia dehan, ekipa neebe ami mai hamutuk nee, ekipa boot husi Woodside Energy neebe ami lori no iha oportunidade ida nee ami ba vizita kosta sul nee mos primeiru vez.
“Hau espera katak ida nee pasu primeiru neebe sei kontinua akontese hodi dezenvolve Greater Sunrise,” Julie Fallon Hakotu.
(EST 1)
