DILI, STLTIMORLESTE.com – Primeiru Ministru (PM), Kay Rala Xanana Gusmão hateten, Dili Internasional Expo 2025 hanesan oportunidade ida atu hatudu ita nia produtu sira, halibur inovador no investidor sira hodi promove ekonomia Timor nian neebe foun no diversifikadu.
Lia hirak nee hatoo husi Primeiru Ministru (PM), Kay Rala Xanana Gusmão ba jornalista sira hafoin halo abertura ba Dili Internaional Expo Trade 2025, iha Sentru Konvensaun Dili, Kinta nee (28/08/2025).
“Ida nee hanesan Expo dahuluk iha Timor Leste neebe organiza husi Ministeriu Komersiu no Industria (MCI), nee ita nia maneira atu hateten ba mundu katak, Timor Leste nakloke ba negosiu,” dehan PM Xanana.
PM Xanana dehan, Expo hanesan oportunidade ida ba emprezariu Timor Leste, empreza ki’ik no mediu sira atu fahe no aprende ba malu, ida nee mak oportunidade ida atu hatudu inovasaun sira, kultura no teknolojia, no ida nee mak oportunidade ida atu haburas kolaborasaun iha setor oin-oin.
“Expo ida nee hatudu produtu diak balun neebe Timor Leste produs no esporta ba mundu, ita nia kafé no bebida alkolika, masin no xokolate organiku, ita nia seramika, artezanatu no tais tradisional ita prove ona ba mundu,” Xanana dehan.
Xanana tenik, presiza kria empregu atu hamenus kiak no atu fo oportunidade ba ita nia joven sira hodi harii sira nia moris iha ita nia rain.
“Ami servisu makaas atu harii instituisaun sira, kria estabilidade no fo ba ami nia povu nia nesesidade, ita harii nasaun demokratiku no ekonomia nakloke, ho respeitu ba direitus umanus no estadu direitu,” tenik Xanana.
Xanana afirma, laiha servisu laiha dignidade, laiha kampu trabalhu ita nia joven sira labele haree sira nia futuru iha Timor no la ho empregu independensia laiha sentidu.
Xanana fundamenta, Expo ida nee selebra partikularmente Timoroan sira neebe kria no marka sira nia produtu rasik.
“Sira mak inovador neebe inspira ema seluk no hatudu saida mak posivel, sira prova katak Timor Leste bele halo produtu ho kualidade no faan ba mundu,” hakotu Xanana.
Jornalista: EST 1
Editor: Xisto Mendonça
